Назарбоев Трампнинг Донбасс бўйича ғояси ҳақида гапирди

Қозоғистон президенти Нурсултон Назарбоевнинг маълум қилишича, АҚШ раҳбари Дональд Трамп Донбассдаги можарога ечим топиш бўйича музокараларни Минскдан бошқа шаҳарга кўчиришни таклиф қилган. Бу ҳақда «Интерфакс» хабар бермоқда.

Назарбоев Нью-Йоркда БМТ Хавфсизлик Кенгашининг йиғилиши якунлари бўйича матбуот анжуманида шундай баёнот билан чиқди.

«Биз «Минск-1» тўхтаб қолгани, боши берк кўчага кириб қолгани, «Минск-2» кераклиги ҳақида гаплашдик. У шундай деди: «Келинг, бошқа жойга кўчирамиз». Мен эса: «Майли» дедим», - дея айтиб ўтди Қозоғистон раҳбари.

Унинг қўшимча қилишича, катта эҳтимол билан янги музокаралар Қозоғистондаги шаҳарлардан бирида ташкил этилади.

«Менинг фикримча, Минск келишувлари боши берк кўчага кириб қолди. Ҳозирда тинчликпарвар кучларни Донбасс ҳамда Луганскка киритиш керак, улар чегарани аниқлаб бериши лозим. Уларнинг позицияларини яқинлаштириш, ўзаро муросага келтириш керак. Бугун бу нарса йўқ», - дея хулоса қилди Назарбоев.