Қарағандалик қария 40 даража совуқда бир футболкада юришни одат қилган

Қозоғистоннинг Қарағандасида яшовчи пенсионер Байилди Тере 40 даража совуқни писанд қилмай, эгнида бир футболка ва юпқа шимда юришдан қўрқмайди. 65 ёшли эркак учун бундай совуқ ҳавода юпун кийиниш одатга айланган. Saryarqa телеканали бу ноодатий эркак ҳақида лавҳа тайёрлади.

Қария пенсияга чиққач, уйида қўл қовуштириб ўтиришни истамади. У Қарағандадаги ҳарбий қисмлардан бирига фаррош бўлиб ишга кирган. “Совуқ ҳаво танани жанговар ҳолатда ушлаб туради. Тана қизғин ҳолда бўлганда, ҳеч қандай касалликлар бўлмайди. Фикримча, барча касалликларнинг давоси бизнинг миямиздадир. Айтишади-ку, нима ўйласанг, шуни оласан”, деб айтади эркак.   

Қария қишки ҳавода кўчага юпун ҳолда чиқишни 25 йил аввал бошлаган. Ўшанда у ҳеч қанча совуқ қотмаган. У шундан кейин буни такрор-такрор қайтарган. Кейин эса организми бунга кўника бошлаганини англаган. Ўшандан бери у бирор марта касал бўлмаган ва шифокорга мурожаат қилмаган. 

“Буни биринчи марта қилганимда ё ноябрь, ё декабрмиди, қор ёққанди. Мен йўлакка чиқиб, эшикка яқинлашганимда курткамни эсдан чиқарганим ёдимга тушган. Шунда қандайдир куч менга ортимга қайтишга йўл бермаган. Ва мен шундай ҳолимда кўчага чиқиб кетганман. Мени юпун ҳолда кўрганлар кийимларини ечиб менга бермоқчи бўладилар. Мен эса уларга менга совуқ эмаслигини, кийим керакмаслигини тушунтириб, раҳмат айтаман”, дейди “совқотмас одам”.  

Қария чиниқишни истовчиларга дастлаб ўз организмини бунга тайёрлаш кераклигини маслаҳат қилмоқда. Қалин кийимларни ечиб, кўчага дарров чиқиб кетиш ярамайди, чунки бунда шокка тушиш мумкин. Шу сабабли буни секин-асталик билан амалга ошириш лозим. Айниқса, бу ёши катталарга тааллуқлидир.