Тошкентда жамоат транспортидан фойдаланиш қулайлаштирилади

Шавкат Мирзиёев 9 февраль куни пойтахтимизда амалга оширилаётган бунёдкорлик ва ободонлаштириш ишлари билан танишиш, халқ билан мулоқот қилиш мақсадида Юнусобод туманида бўлди.

Давлат раҳбари Тошкент метрополитени Юнусобод йўналиши 2-босқич қурилиш ишларини кўздан кечирди.

Айни вақтда Тошкент метрополитени Юнусобод линиясининг иккинчи босқичини бунёд этиш ишлари жадал амалга оширилмоқда.

ЎзА хабарига кўра, президент қурилиш ишлари билан танишар экан, бу каби мураккаб жараён нафақат маблағ, балки ақлий меҳнат ва юксак маҳорат, чуқур билим ва тафаккур, юқори технологияларни талаб қилишини таъкидлаган.

Метронинг тоннель асосини яратиш мақсадида 305 метрда бетон ишлари бажарилган ва 330 та йиғма темир-бетон конструкциялари ўрнатилган. Тупроқ кўчишини олдини олиш учун 128 та бетон устун тўлиқ ўрнатилган. Метронинг якуний қисмида «Туркистон» бекатини қуриш ишлари олиб борилмоқда.

«Энг асосий масала пойтахтимиз кўчаларидаги тирбандликнинг олдини олиш. Бунда метро энг қулай воситадир. Жамоат транспорти ҳаракатида режали жадвални шакллантириш керак. Яъни автобус ҳам, метро ҳам бир йўналишда ҳаракат қилмаслиги, бир бирини такрорламаслиги керак. Бунинг учун бекатлар бўйича мониторинг олиб бориш зарур.

Метрополитен арзонлиги, хавфсизлиги ва логистикаси билан одамларга қулайлик яратиши керак», деган президент.

Қурилишга 200 дан ортиқ ишчи ва муҳандис, 40 та техника ва механизм жалб этилган. Метро қурилишига Германиядан ер ости тоннелини қазиш комплекси олиб келиниб, ушбу техника Германиялик мутахассислар билан бирга йиғилмоқда. Германиядан бурғулаш ва темир-бетон қозиқ қоқиш техникалари, 2 та 220 тонналик, 3 та 70 тонналик ва Хитойдан 10 та 50 тонналик кранлар олинган.

Қурилаётган метро участкасининг узунлиги 2,9 километр бўлиб, уни 2019 йилда фойдаланишга топширилиши мўлжалланган.

Президентимизга метро бекатларининг кўриниши, уларни замонавий ва миллий анъаналар асосида қуриш ва безаш бўйича маълумот берилди. Метро қурилишида ишлатилаётган техникалар намойиш этилган.

Шу ерда Тошкент шаҳри бўйлаб барпо этилаётган ер усти метроси қурилиши ҳақида ҳам маълумот берилган.

Шавкат Мирзиёев мутахассислар билан суҳбатлашиб, тегишли кўрсатмалар берган.