Флоридадаги отишмадан кейин полициячи қўрқоқликда айбланиб истеъфога чиқарилди

14 февралда 17 киши отиб ташланган Флорида штатининг Паркленд шаҳридаги мактабни қўриқлаган полиция зобити унга нисбатан хизмат тафтиши бошлангандан кейин истеъфога чиқди. Бу ҳақда АВС телеканали хабар бермоқда.  

Бровард округи шерифи Скотт Исраэлнинг айтишича, мактабдаги отишмадан кейин унинг ёрдамчиси Скот Петерсен тафтиш вақтига маоши сақланмаган ҳолда ишдан четлатилган. Терговнинг бошланишига қуролланган Петерсен отишма бошлангандан кейин мактаб ичига кирмагани акс этган видеоёзув сабаб бўлган.

“У мактабга кириб, қотил билан олишиб, уни йўқ қилиши керак эди”, деб айтган шериф ва Петерсен ушбу вазиятда “мутлақ ҳеч нарса қилмаганини” қўшимча қилган.

Паркленддаги отишмани содир этиш гумони билан ушбу мактабнинг собиқ ўқувчиси, 1999 йилда туғилган Николас Круз ҳибсга олинган.