Биатлон бўйича жаҳон кубогининг Россиядаги босқичига Чехия ҳам бойкот эълон қилди   

Чехиялик биатлончилар жаҳон кубогининг Россиянинг Тюменида ўтадиган босқичига бойкот эълон қилдилар. Ушбу босқич 22-25 март кунлари ўтиши керак. Бундан аввалроқ АҚШ терма жамоаси Россиядаги мусобақани бойкот қилганди. 

Чехиянинг iDnes нашрининг маълум қилишича, жаҳон кубогининг якунловчи босқичига бормаслик қарорини Чехия биатлон федерацияси раҳбари Иржи Хамза қабул қилган. Чехия россиялик биатлончилар томондан допинг қабул қилинишига мунтазам қарши чиқиб келган ва бойкот эълон қилиниши шу муносабатнинг бир қисми ҳисобланади.

Хамзанинг айтишича, Тюмендаги босқич бўйича АҚШ ва Канада қатъий позицияга эга бўлиб, улардан ташқари Франция ҳам Россияни танқид қилган. Бироқ франциялик биатлончилар етакчиси Мартен Фуркад Тюменга бориш истагини билдирган. “Мен Фуркаддан сўраганимда, у Россияга бориши кераклигини, чунки умумий жадвалда ғалаба учун курашаётганини ва бу босқич у учун муҳимлигини айтди. Бундай қарор қабул қилиш унинг ҳуқуқи”, деб айтган Хамза.

Шу билан бирга Чехия биатлон федерациясида Тюмендаги босқичнинг инкор этилиши кейинги жаҳон чемпионати учун спортчиларга бериладиган квотага таъсир қилиши мумкинлиги тан олинган. “Бироқ барчасига кўз юмилаверса, унда ҳеч нарса ўзгармайди”, деб таъкидлаб ўтган Хамза.

Биатлон бўйича жаҳон кубоги 9 та босқичдан иборат бўлиб, унинг сўнгги босқичи айнан Тюменда бўлиб ўтади.