Флоридада ўқитувчиларга қурол олиб юришга рухсат берувчи қонун қабул қилинди

АҚШнинг Флорида штати вакиллар палатаси қуролни эркин олиб юришга бир қатор чекловлар киритувчи қонун лойиҳасини қабул қилди.

Вакиллар палатаси 67 та овоз билан қонун лойиҳасини қабул қилган, унга 50 депутат қарши чиққан. Қонун мактаб ўқитувчилари ва бошқа ходимларига қурол олиб юришга рухсат беради. Бундан ташқари, қурол сотиб олиш минимал ёши 18 ёшдан 21 ёшгача кўтарилган. Шунингдек, ўқотар қурол харид қилишда 3 кунлик кутиш даври киритилади. Бу қуролни жаҳл устида ёки касали хуруж қилганда харид қилувчиларга халақит қилиш мақсадида жорий қилинади. 

Штат сенати ушбу қонун лойиҳасини аввалроқ қабул қилганди, энди уни штат губернатори Рик Скотт имзоласа бўлди. Скотт ўқитувчилар қуролланишига қаршилигини, бироқ бу қонун лойиҳасига тақиқлов киритиши-киритмаслиги борасида аниқ фикр айтмаган.

14 февралда Флоридадаги мактаблардан бирида шу мактабнинг 19 ёшли собиқ ўқувчиси томонидан оммавий қотиллик содир этилди. У содир этган отишма оқибатида 17 киши ҳалок бўлган.