Россиялик миллиардер Зиёвудин Магомедов ҳибсга олинди
Москванинг Тверь суди фирибгарлик ва жиноий тўда ташкил этишда гумон қилинаётган миллиардер Зиёвудин Магомедовни ҳибсга олди.
Судья Магомедовни етказилган зарар – 2,5 млрд рубль қийматдаги гаров пулига қўйиб юборишдан бош тортган.
Магомедов ўз номига билдирилаётган айбловларни қатъиян рад этишини айтган.
Аввалроқ ушбу ишнинг бошқа бир фигуранти – тадбиркор Артур Максидов ҳибсга олинган.
Россиянинг 100 нафар энг бой одамлари рўйхатига кирувчи, “Сумма” гуруҳи эгаси Зиёвудин Магомедов 30 март куни сўроқдан кейин ҳибсга олинган. 31 мартда судда у 2,5 млрд рубль ўмарган жиноий гуруҳни ташкил этишда гумон қилинаётгани маълум бўлган.
Тахмин қилинишича, ушбу жиноий иш эпизодларидан бири Калининградда “Арена Балтика” стадиони қурилишида амалга оширилган талон-тарожликлар билан боғланган.
Магомедов ҳимояси тергов Магомедовга “Сумма” гуруҳи раҳбари бўлгани учунгина айблов қўяётганни айтган. Бу гуруҳга эса жиноий ишга аралашган компаниялар киради.