Тожикистонда интернет сотиб олиш билан боғлиқ йирик можаро юзага келди

Тожикистоннинг Монополияга қарши хизмати интернет-трафикни фақат «Тожиктелеком» ширкатидан олиш ҳақида ҳеч қандай буйруқ йўқлигини маълум қилди, деб ёзмоқда «АП».

Қайд этилишича, бундай талаблар ҳақиқатдан узоқ.

Бу ҳақда хизматнинг мамлакатдаги уяли алоқа операторлари уюшмасига хатида айтилади. У Монополияга қарши хизматга «Тожиктелеком» давлат компаниясининг тожик провайдерлари ва мобил алоқа компаниялари учун интернет-трафикни сотиш бўйича эксклюзив ҳуқуқлари борасида изоҳ сўраб мурожаат қилган.

«Хатда кўрсатилишича, «Тожиктелеком» ОАЖ Монополияга қарши хизматга чет элдан интернет-трафикнинг ягона харидори ва кейинги тарқатувчиси бўлиш борасида ариза бермаган. Монополияга қарши хизмат «Тожиктелеком»дан мурожаат йўқлиги сабабли интернетга нархларни ҳали белгиламади», - дея хабар берган «АП»га мамлакат мобил алоқа операторлари ассоциациясидаги манба.

Шу билан бирга, Тожикистон ҳукумати ҳузуридаги Хизматга қарашли корхона бўлган «Тожиктелеком» миллий провайдери айни пайтда барча тожик провайдерлари ва мобил компанияларга интернет-трафикни сотмоқда, уларга янги йилдан бошлаб қўшни мамлакатлардан интернетни сотиб олишни тақиқлаган.

Йил бошидан буён мобил компаниялар ва интернет-провайдерлар миллий оператордан бир гигабит канал учун 51 минг долларлик нархда интернет харид қилишни давом эттирмоқда.

Таққослаш учун: илгари улар Қирғизистон, Ўзбекистон ва Хитойдан ўша ҳажмдаги интернетни 10-20 минг доллардан улгуржига сотиб олган.

Шу билан бирга, «Тожиктелеком» интернетга кириш хизматларига тарифларни 20 фоизга пасайтирди.