Дербилар ҳафтаси. Европада тур ўйинлари анонси

Европа миллий чемпионатлари якуний палласига кириб бормоқда. Хусусан, Англияда ва Германияда эртагаёқ чемпион номини расман билиб олишимиз мумкин. Шунингдек, бу ҳафта Ливерпуль, Манчестер, Мадрид дербилари каби бир қатор қизиқарли тўқнашувлар билан ҳам қизиқ.

ЭВЕРТОН - ЛИВЕРПУЛЬ (7 апрель, 16:30)

Куни кеча мавсумдаги ўзининг энг яхши ўйинини ўтказган «Ливерпуль» энди Англия Премьер-Лигасидаги вазифаларига киришади. Тўғри, ўтган турда «Тоттенҳэм»нинг «Челси» устидан ғалабаси Топ-4 ни шакллантирди, эндиликда Клопп шогирдлари «Челси»дан 11 очко (бир ўйин кўп ўтказиб) олдинда боришмоқда. Шундай бўлса-да, имкон қадар 2-ўринни қўлга киритишга уриниш, бундан ташқари, рақиб ҳам оддий эмас, Ливерпуль дербиси кутиб турибди.

«Эвертон»нинг қўшниларини ютганига анча бўлди, «кўклар» охирги марта 2010 йилнинг октябрида ғалаба қозонганди. Аммо бу ҳолат дербининг бир томонлама ўтишини билдирмайди, зеро, айниқса, «Гудисон Парк»да ўтадиган ўйинларда доим «Ливерпуль»га қийин бўлган. Жумладан, бу стадиондаги охирги беш ўйиндан тўрттасида дуранг қайд этилган. Шунингдек, ушбу мавсумдаги илк ўйин ҳам 1:1 ҳисобида тугагани эсингизда бўлса керак. Сўнгги дақиқалардаги пенальти «Эвертон»га бир очко олиб келганди.

ЕЧЛдаги йирик ғалаба «Ливерпуль»нинг кейинги босқичга чиқиш имкониятини оширган бўлса-да, ҳаммаси ҳал бўлмаган, шунинг учун Клопп ақлининг бир чеккасида келаси ҳафтадаги ўйинни олиб қўйса ажабмас. Аммо бусиз ҳам жамоа таркибида муаммолар кўп: Адам Лаллана ва Эмре Жан жароҳат олган, Жоэл Матип умуман мавсум охиригача сафдан чиққан. Яна бир марказий ҳимоячи Рагнар Клаван ҳам майдонга туша олмайди. Яъни шундоқ ҳам Клоппда етарлича ротация қилиш имкони йўқ. Энг ёмони, жамоа етакчиси Муҳаммад Салоҳ ҳам ЕЧЛ ўйинида жароҳат олди ва қачон сафга қайтиши ҳали номаълум.

Ўз навбатида, «Эвертон»да ҳам ҳаммаси жойида эмас. Маккарти, Мангаля ва Сигурдссонлар узоқ муддат жамоага ёрдам бера олмайди. Фақат Идрис Гуйенинг бу ўйинга қайтиб қолишидан умид бор холос. «Эвертон»нинг турнир жадвалидаги ҳолати ва «Ливерпуль»нинг ЕЧЛда ўйини борлиги бу учрашувнинг бироз хотиржам руҳда ўтишини далолат қилса-да, дерби барибир дерби, мухлисларнинг суюклиларини олға бошлашларидан умидимиз бор.

АУСБУРГ - БАВАРИЯ (7 апрель, 18:30)

Атайлаб эрта қўйишганини қаранг, гўёки Бундеслиганинг энг одатий учрашувларидан бири, лекин бу ўйиндаги ғалаба мюнхенликларни расман чемпионга айлантиради. Яъни Манчестер дербиси бироз кеч бўлишини эътиборга олсак, Европадаги илк чемпион номини билиб олишимиз мумкин.

Бунга «Аусбург» ҳам унча қарши бўлмаса керак. Турнир жадвалининг ўртасидан ишончли жой олган мезбонлар «Бавария»га қарши сўнгги 16 ўйиннинг атиги 2 тасида ғалаба қозонишган холос. Биринчи даврада Мюнхенда бўлган ўйинда мезбонлар 3:0 ҳисобида устун келгандилар. Бу стадионда ўтган охирги икки ўйин ҳам «Бавария» фойдасига, бир хил 3:1 ҳисобида якунланган. 

МАНЧЕСТЕР СИТИ - МАНЧЕСТЕР ЮНАЙТЕД (7 апрель, 21:30)

Шаҳарнинг «ҳаворанг» қисми бу ўйинни интизорлик билан кутгани шубҳасиз. Гвардиола шогирдлари айнан мана шу ўйинда чемпионликни расмийлаштиришлари мумкин, бунинг устига рақиб ашаддий «душманинг» бўлса, эҳтирослар икки баробар ошиб кетади.

Аммо афсуски, шу кунларда эҳтиросга ўрин йўқ, катта эҳтимол билан «Сити» мухлислари «Ливерпуль»га қарши жавоб ўйин ўтиб, ҳаммаси бир ёқлик бўлмагунча ичларига чироқ ёнса ёришмайди. «Чемпионлик баҳси» айнан мана шундай оғир кунга тўғри келгани ҳам тақдир ҳазили бўлса керак. Ахир Ливерпулда кўнгилдаги ҳисобни қайд этиб, минглаб мухлислар қаршисида АПЛ чемпионлигини нишонлашнинг гашти бошқача бўларди-да...

Шусиз ҳам, Гвардиоланинг бу ўйинга бироз панжа ортидан қараётгани ҳақида хабарлар тарқалганди. Бу ўйин бўлмаса, ютиб чемпион бўлиш мумкин яна 6 ўйин кутиб турганда, мураббийнинг асосий фикри «Ливерпуль» билан банд бўлиши табиий эди. Шунинг учун ҳам бир қатор етакчи футболчиларга дам берилиши тахмин қилинмоқда. Аслида, «Сити»дан сўрасангиз, шу тобда ҳеч қандай ўйин ўтказилмай тургани ҳам яхши эди.

Бу ҳолат Жозе Моуриньо ва жамоаси учун айни муддао. 2-ўрин учун курашаётган «иблислар» португалиялик мураббий қўл остида «Манчестер Сити»ни фақат бир марта ютишган, у ҳам бўлса, Англия Лига кубоги баҳсида эди. Ўшанда ҳам рақиб деярли иккинчи таркибни туширган. Ўтган йилнинг октябрида бўлиб ўтган ўйиннинг эсга келганига яна бир сабаб, ўшанда «Сити» футболчилари рақиб дарвозасига бирор марта ҳам аниқ зарба бера олмаган экан. Орадан шунча вақт ўтиб, «Ливерпуль»га қарши ўйинда мана шу антирекорд такрорланди.

Мезбонлар таркибида Серхио Агуэро тикланиб сафга қайтиш арафасида. Аммо катта эҳтимол билан Пеп Гвардиола уни майдонга туширмаса керак. «Юнайтед» сафида эса ҳали ҳам Фил Жонсдан дарак йўқ, Дейли Блинд машғулотларга киришгани айтилмоқда.

Айтганча, агар бу ўйинда «Манчестер Сити» ғалаба қозонса, яъни чемпион бўлса, Англия Премьер Лигаси тарихида энг эрта (7 апрель) чемпион бўлган жамоа сифатида рекорд қўяди. Бунгача, энг эрта 14 апрелда чемпионлик масаласи ҳал бўлганди. Қизиғи, энг кеч чемпион бўлиш рекордини ҳеч ким «Манчестер Сити»дан тортиб ололмаса керак. 2011/12 мавсумнинг сўнгги турида ўйин тугашига 40 секунд қолганда киритилган гол «шаҳарликлар»ни чемпионга айлантирганди.

РЕАЛ - АТЛЕТИКО (8 апрель, 19:15)

Сўнгги 12 ўйиннинг 11 тасини ғалаба билан якунлаган «Реал» «Атлетико»га анча яқинлашиб олди ва бу ўйиндаги ғалаба ўртадаги фарқни минимал даражага туширади. Ҳозир бутун хаёли қаторасига учинчи марта Чемпионлар Лигасида ғолиб чиқиш бўлган Зидан шогирдлари жавоб ўйини олдидан жуда қулай ҳисобга эга бўлишди, демак бор куч билан Мадрид дербисида ғалаба қозонишга уринилса бўлади.

Икки жамоа ўртасидаги ўйинлар статистикаси сўнгги йилларда деярли тенг бўлиб қолди. Охирги 10 ўйинда томонлар икки мартадан ғалаба қозонишган бўлса, олти ўйин дуранг билан якунланди. Жумладан биринчи даврада «Висенте Кальдерон»дан бўлиб ўтган ўйинда ҳам ҳисоб очилмаганди.

Мезбонлар таркибида фақат Начо жароҳатланган бўлса, Симеоне биратўла уч асосий ҳимоячисини тушира олмайди. Хосе Хименес, Хуанфран ва Филипе Луислар сўнгги ўйинларни ўтказиб юборишди. Улар ичида фақат Филипе Луис майдонга қайтиши мумкин.

АЙНТРАХТ - ҲОФФЕНҲАЙМ (8 апрель, 21:00) 

Шу пайтгача Бундеслигада ЕЧЛ йўлланмасини берувчи 4 ўрин учун олти жамоа даъвогарлик қилиб келаётганини айтиб келаётгандик. Ўша етакчиларнинг беқарор ўйинлари (масалан, «Айнтрахт» сўнгги беш ўйиннинг учтасида ютқазди) ва «Ҳоффенҳайм» натижаларидаги ўсиш (сўнгги 4 ўйинда 3 ғалаба, тўплар нисбати 14-3) оқибатида бундай жамоалар 7 тага етди. Яъни, эндиликда 7-ўриндаги «Ҳоффенҳайм»ни кучли тўртликдан атиги 4 очко ажратиб турибди холос.

Бу ўйиндаги ғалаба билан меҳмонлар «Айнтрахт»га етволишлари мумкин, аксинча, агар мезбонлар ютишса, «Ҳоффенҳайм»нинг ЕЧЛ умиди буткул сўнса керак. Шу томондан бу учрашувни 6 очколик баҳс деб бемалол таърифлай оламиз.

Ҳар икки жамоа ҳам муҳим ўйин олдидан жуда оғир ҳолатда, жароҳатланганлар кўп. Мезбонлар таркибида Ребич, Селседо, Боатенг, Русс каби асосий таркиб ўйинчилари майдонга туша олишмайди. Рақиб жамоа таркибида эса, Ҳюбнер, Демирбай ва Гнабри йўқ.

Биринчи даврадаги ўйинда Кевин-Принц Боатенгнинг биринчи таймда урган голига учрашувнинг сўнгги дақиқасида Марк Ут жавоб берганди ва ўйин 1:1 ҳисобида якунланганди.

ЛЕЙПЦИГ - БАЙЕР (9 апрель, 23:30)

Ўша «Бавария»нинг ортидан бораётган ва ЕЧЛ йўлланмаси учун курашаётган бешликдан яна иккитаси бу турда тўқнаш келади. «РБ Лейпциг» 28 ўйиндан 46 очко билан 4-ўринда бораётган бўлса, «Байер» ҳисобида шунда ўйиндан 45 очко бор. Бу ўйин ғолиби тур охирида кучли тўртликдан ўрин эгаллайди.

Ўйин Бундеслига учун ноодатий бўлган душанба куни бўлиб ўтади. Сабаби, «РБ Лейпциг» Европа Лигасидаги курашни давом эттирмоқда ва кеча ўз майдонида Франциянинг «Марсель» клубини қабул қилди. Демак, бу борада меҳмонларнинг бироз устунлиги бор, сабаби, «Лейпциг» уч кун ичида етарлича тикланиб улгурмаслиги мумкин.

Таркибларга келсак, ливеркузенликларнинг йўқотишлари каттароқ: Ларс Бендер ва Жонатан Та ҳали тўлиқ тикланиб улгуришгани йўқ. Шунингдек, сўнгги турларда анча самарали ўйнашни бошлаган аргентиналик ҳужумчи Лукас Аларио ўтган ўйинда ҳакам томонидан майдондан четлатилган, дисквалификация туфайли у бу ўйинда майдонга туша олмайди.

Томонлар атиги уч марта ўзаро тўқнаш келишган ва ҳали бирор марта «Байер» ғалаба қозонгани йўқ. Ўтган мавсумда ҳар икки ўйинда «Лейпциг»нинг қўли баланд келган, биринчи даврадаги ўйин эса, жанговор дуранг – 2:2 ҳисобида тугаган. 

БОШҚА ЎЙИНЛАР:
7 апрель: Беневенто - ЮВЕНТУС (18:00), Сток Сити - ТОТТЕНҲЭМ (19:00), БАРСЕЛОНА - Леганес (23:45)
8 апрель: Торино - ИНТЕР (15:30), НАПОЛИ - Кьево (18:00), АРСЕНАЛ - Саутҳемптон (18:15), ЧЕЛСИ - Вест Ҳэм (20:30), МИЛАН - Сассуоло (23:45).

Қаҳрамон Асланов тайёрлади