Туркманистон Беларусь томонидан қуриб берилган 1 млрд долларлик комбинатдан норози

Туркманистон Вазирлар Маҳкамасининг навбатдаги мажлиси давомида шу нарса маълум бўлдики, «Гарлиқ тоғ-кон комбинати қурилиши бош пудратчилари бўлган Беларусь мутахассислари ўз шартнома мажбуриятларини тўлиқ бажармаган», деб хабар қилмоқда «Нейтральний Туркменистан» газетаси.

Комплекс фаолиятини меҳнатни муҳофаза қилиш ва техника хавфсизлиги талабларига мувофиқлигини текшириш жараёнида камчиликлар аниқланган.

Натижада, Туркманистон президенти Гурбангули Бердимуҳамедов бош вазирнинг саноат бўйича ўринбосари Керим Дурдимирадов, ташқи ишлар вазири Рашид Мередов ва Давлат комиссияси раисига Гарлиқ кон-руда комплексини текширувдан ўтказиш бўйича вазифани топширди.

Эслатиб ўтамиз, қиймати 1,1 млрд доллар бўлган ва беларуслик мутахассислар томонидан қурилган Гарлиқ кон-бойитиш комбинати 2017 йилнинг 31 март куни фойдаланишга топширилди. Очилиш маросимида Туркманистон президенти Гурбангули Бердимуҳамедов ва Беларусь етакчиси Александр Лукашенко иштирок этган.

Янги корхона нафақат Туркманистон қишлоқ хўжалиги эҳтиёжларини қондириш, балки жаҳон бозорида талабгир бўлган маҳсулотни экспорт қилиш имконини бериши ҳам тахмин қилинганди. Йилига 1,4 млн тонна калийли ўғит қувватига эга комплекс Марказий Осиёдаги энг йириги саналади.

Айни дамда Туркманистон иккинчи калий комбинатини қуриш учун тендер ўтказмоқда. Аввалига қурилиш билан Беларуснинг ўша компанияси шуғулланиши тахмин этилганди, бироқ кейинчалик «Беларуськалий» бош директори Иван Головатий компания тендерга мурожаат билан чиқмагани, сабаби Туркманистон ҳукумати томонидан таклиф этилган шартлар ёқмагани ҳақида маълум қилган.