Москвада Гагарин машқ қилган барокамерани ўғирлаб кетишди

Москва шаҳри ҳуқуқни муҳофаза қилиш органлари ходимлари Строгинодаги қўриқланадиган тураргоҳдан Космонавтика музейи экспонати – Юрий Гагарин машғулотлар ўтказган барокамерани ўмариб кетган номаълум шахсларни изламоқда. Бу ҳақда «Москва» янгиликлар агентлиги манбага асосан хабар берди.

«Полицияга аризачи мурожаат қилди, у Космонавтика музейида парвозларга тайёргарлик кўриш соҳаси эксперти сифатида ишлашини айтди. Унинг билдиришича, Строгинодаги 1-Ликовская кўчасида жойлашган тураргоҳда музей экспонати йўқ эканини аниқлаган. Ушбу ҳолат бўйича жиноий иш қўзғатилди. Етказилган зарар миқдори 300 минг рублни ташкил этган», - дея айтиб ўтди манба.

Гап «Сурдобарокамера 48» (СБК-48) ҳақида кетмоқда, у парвоз таркибини баланд масофаларда синовдан ўтказиш ва турли тадқиқотларни амалга оширишга мўлжалланган. Гагарин унда 1960 йилнинг 26 июлидан 5 августига қадар шуғулланган.