Африка қитъасида жойлашган Свазиленд давлати қироли Мсвати Учинчи мамлакатнинг номи ўзгартирилишини эълон қилди: энди у Исватини деб аталади. Бу маҳаллий тилда «свази халқи ери» деб таржима қилинади. Бу ҳақда Зимбабвенинг Zimeye ахборот сайти маълум қилди.
«Қаерга бормайлик, одамлар бизни Швейцария деб атайди (Swaziland - Switzerland). Мен Свазиленд ўзининг азалий номига қайтаётганини эълон қилмоқчиман. Африка давлатлари мустақилликка эришиш вақтида мустамлака қилингунларигача ишлатилган ўзларининг эски номларига қайтишган. Энди давлатимиз расман Исватини қироллиги деб аталади», деб айтган қирол Манзини шаҳрида мамлакат мустақиллигининг 50 йиллик юбилейи вақтида. Эътиборлиси, қирол ҳам 50 ёшини қаршиламоқда.
Порталнинг маълум қилишича, Свазиленд 1968 йилда Буюк Британиядан мустақил бўлганидан кейин мамлакатнинг британча номланишини сақлаб қолганди. Мамлакатнинг қайта номланиши ғояси кўп йиллар муҳокама қилинган, чунки маҳаллий аҳоли ва мамлакат раҳбарияти кўпроқ унинг тарихий номидан фойдаланишган.
Свазиленд ЖАР ва Мозамбик ўртасида жойлашган кичик давлат бўлиб, унинг аҳолиси 1,4 млндан кўпроқ кишини ташкил қилади.
