Ўзбекистоннинг тўқимачилик маҳсулотлари Европа бозори сертификациясига эга бўлмоқда

"Ўзтўқимачиликсаноат" ассоциациясида Ўзбекистон-Германия ҳамкорлигидаги "Европа бозори учун тўқимачилик маҳсулотлари сертификацияси" мавзуида семинар бўлиб ўтди. Тадбир соҳада замонавий технологияларни татбиқ этиш, ташқи бозорда маҳаллий тўқимачилик ва тикув-трикотаж маҳсулотларининг рақобатбардошлигини ошириш ҳамда уларнинг Европа бозорларига чиқишини соддалаштириш масалаларига бағишланди. Ассоциация матбуот котиби KUN.UZ'га шу ҳақида хабар берди.

"Ўзтўқимачиликсаноат" ассоциациясининг FI Hohenstein (Германиянинг Хохенштайн тадқиқот институти) билан ҳамкорликда ташкил этилган анжуманида Ўзбекистон стандартлаштириш, метрология ва сертификация агентлиги бош директори ўринбосари Музаффар Хамзаев, вазирлик ва идоралар вакиллари, шунингдек Ўзбекистоннинг текстиль компаниялари вакиллари иштирок этишди.

Семинар давомида "Ўзтўқимачиликсаноат" ассоциацияси раиси И.У.Ҳайдаров республикада сифатли тўқимачилик ва тикув-трикотаж маҳсулотларининг кенг ассортиментини ишлаб чиқариш, шунингдек маҳаллий ишлаб чиқарувчиларнинг экспорт салоҳиятини оширишга йўналтирилган комплекс чора-тадбирлар амалга оширилаётганини таъкидлади.

Ўтган давр мобайнида Ўзбекистонда соҳа ривожи учун зарур ҳуқуқий база ва қулай шароитлар шакллантирилди. Шундай бўлса-да, маҳсулотлар синовига йўналтирилган лабораторияларнинг паст самарадорлиги ва уларнинг аксариятида халқаро аккредитацияларнинг йўқлиги экспорт салоҳиятини оширишга тўсқинлиқ қилмоқда.

Шунингдек миллий стандартларни халқаро талабларга мувофиқлаштириш ва сифат менежментига замонавий тизимларни кенг татбиқ қилиш маҳаллий маҳсулотларнинг рақобатбардошлигини оширишга ва ташқи савдодаги тўсиқларни бартараф этишга ёрдам беради.

Семинарда Германиянинг Хохенштайн тадқиқот институти асосчиси ва президенти Стефан Михельс тақдимот билан иштирок этди.

Маълумот учун: Hohenstein Institute — Германиянинг халқаро миқёсда тан олинган тўқимачилик тадқиқотлари ва сервиси мустақил маркази. Унинг лабараториялари маҳсулотларнинг сифатини нейтрал ва мустақил текширувини амалга оширади.

Бундан ташқари, Германия делегацияси UZTEX Group'да бўлди. У ерда германиялик мутахассисларни UZTEX маҳсулотлари Европа Иттифоқи ва МДҲ мамлакатларига, шунингдек АҚШ, Туркия, Япония, Жанубий Корея ва кўплаб бошқа давлатларга экспорт қилиниши ҳақида маълумот берилди.

Учрашув якунларига кўра, UZTEX Group компаниясига тантанали равишда «Oeko-Tex Standard 100» сертификати топширилди. Бу компаниянинг текширувлардан муваффақиятли ўтгани билдириб, энди унга тўқимачилик маҳсулотларини Oeko-Tex ёрлиғи билан тақдим этиш ҳуқуқини беради.

«Oeko-Tex Standard 100» – бу хомашё, оралиқ ва якуний маҳсулотни ишлаб чиқаришнинг барча босқичларида мустақил текширув тизими.