Саудия Арабистонининг Яманга берган зарбаси оқибатида тўйга йиғилганлар ҳалок бўлди 

Саудия Арабистони бошчилигидаги халқаро коалициянинг Яманга зарбалар бериши оқибатида снарядлардан бири мамлакат шимолида жойлашган Бани Кайис шаҳрида никоҳ тўйи ўтаётган жой устига тушган. Бунинг оқибатида камида 20 киши, жумладан келин ҳалок бўлган.

Ҳажа вилояти вакилининг маълум қилишича, ҳалок бўлганларнинг кўпчилиги аёллар ва болаларни ташкил қилган. Унинг айтишича, зарба оқибатида 46 киши, жумладан куёв яраланган ва яқин орадаги госпиталга етказилган. Маҳаллий ҳокимият жабрланганлар учун зудлик билан қон йиғиш зарурлигини эъълон қилган.

Шифохона бош шифокорининг айтишича, яраланганлар орасида 30 бола бор ва уларнинг кўпчилиги оғир аҳволда, бир нечта боланинг қўл-оёқлари узилиб кетган.

Саудия Арабистони бошчилигидаги коалициянинг расмий вакиллари авиазарба ҳақидаги маълумотга изоҳ беришдан бош тортишган. Журналистларнинг таъкидлашича, 21 апрелда ҳам авиазарба оқибатида Яманнинг Таиз шаҳри яқинида автобусда бўлган 20 киши ҳалок бўлганди.

23 апрелда коалициянинг зарбасидан аввалроқ яманлик исёнчи ҳусийлар Саудия Арабистони томон 2 та ракета отган. Al Arabiya телеканалининг маълум қилишича, ракеталардан бири уриб туширилган, бошқаси чўл ҳудудига тушган.