Қудратилло Абдуқаҳҳоров ва Шоҳжаҳон Эргашев рейтингда юқорилади

Профессионал боксда фаолиятини давом эттираётган ўзбекистонлик боксчилар Шоҳжаҳон Эргашев ва Қудратулло Абдуқаҳҳоров боксчиларнинг апрель ойи учун чиққан рейтингида юқорилади.

Супер енгил (-63,5 кг) вазн тоифасининг WBA йўналишида жангларда иштирок этаётган Шоҳжаҳон Эргашев апрель ойи учун рейтингда яна икки поғона юқорилаб, 7-ўринда қайд этилди. Аммо Шоҳжаҳон Эргашев номаълум сабабга кўра, ушбу вазн тоифасининг WBC, WBO ва IBF йўналишлари рейтингидан ҳамон ўрин олмаган. Мазкур йўналишларнинг кучли 50 спортчиси рўйхатида Эргашевнинг исм-шарифи йўқ.

Ярим ўрта (-66,68 кг) вазн тоифасида рингга чиқадиган Қудратулло Абдуқаҳҳоров эса Эргашевдан фарқли равишда деярли барча йўналиш рейтингларининг юқори поғонасида бормоқда. WBAда Абдуқаҳҳоров янги рейтинг бўйича 8-ўринга жойлашган бўлса, энг нуфузли йўналиш саналган WBCда у 4-ўринга кўтарилиб олди ва эндиликда чемпионлик камарига биринчи даъвогар билан рингга чиқиш имкониятини қўлга киритди. IBF йўналишида Абдуқаҳҳаров 8-ўринда бормоқда. Ҳозирча WBO йўналиши бўйича рейтингнинг кучли 15талигида Қудраттило қайд қилинмаган.

Эслатиб ўтамиз, Абдуқаҳҳаров (14 ғалаба-0 дуранг-0 мағлубият, 9 нокаут) март ойида венгриялик Ласло Тот устидан ғалаба қозониб, ўзининг WBC кумуш камарини ҳимоя қилган бўлса, Шоҳжаҳон Эргашев (12 ғалаба, 0 мағлубият, 11 нокаут) 28 апрель куни хитойлик Жиминг Вангни (10 ғалаба-3 мағлубият-0 дуранг, 3 нокаут) мағлубиятга учратиб WBA International камари соҳибига айланганди.