Британиялик боксчи Дэвид Хэй Тони Бельюга қарши реванш жангда ҳам ютқазди

Бокс бўйича иккита вазн тоифасида собиқ жаҳон чемпиони, британиялик Дэвид Хэй 90,71 кггача вазн тоифасида ҳамюрти, собиқ WBC чемпиони Тони Бельюга қарши реванш жангда ютқазди. Лондонда ўтган 12-раундлик рейтинг жангида Белью 5-раундда техник нокаут билан ғалаба қозонди.

Боксчилар илк жангларини 2017 йил 4 мартида ўтказишганди: Белью 12 раундлик рейтинг жангида ҳам Хэйни 11-раундда техник нокаут билан мағлуб этганди. Ўша жангда Хэй 6-раундда оёғидан жароҳат олиб, икки марта нокдаун ҳолатига тушгач, унинг секундантлари 11-раундда рингга оқ сочиқни ташлаб, жангни давом эттиришдан воз кечишганди. Жангдан кейин Хэй оёғидаги жароҳати сабабли операция қилинган, Белью эса қўлини синдириб олган. Иккала жангчи ҳам шундан кейин рингга кўтарилмаган эдилар.

2012 йилда фаолиятини якунлаган Хэй 4 йил ўтиб яна рингга қайтган. 37 ёшли боксчининг ҳисобида 28 та ғалаба ва 4 та мағлубият бор.

Белью эса 2016 йил майида 90,71 кггача вазн тоифасида WBC чемпиони камарини қўлга киритган ва октябрда уни ҳимоя қилган. 35 ёшли боксчи фаолиятида 30 та ғалаба, 2 та мағлубият ва битта дуранг натижа қайд қилган.