Эрдўған БМТни кескин танқид қилди

Фото: AP

Туркия президенти Ражаб Тоййиб Эрдўған БМТни дунё муаммоларини ҳал қила олмасликда айблади. У бундай фикрни Ғазо секторидаги тўқнашувлардан кейин БМТнинг ҳаракатсизлиги юзасидан билдирди.

Эрдўғаннинг айтишича, халқаро ташкилот заифлашиб кетган. Унинг фикрича, халқаро ҳамжамият фаластинликлар ҳуқуқ ва эркинликларининг поймол қилиниши борасида иккилик стандартини қўлламоқда.

“Агар бу ҳужумлар бошқа бир минтақада бўлганда, бутун дунёнинг норозилигини келтириб чиқарарди. Бироқ афсуски, дунё ҳамжамияти Исроилнинг фаластинликларга нисбатан ҳаракатларини эътиборсиз қолдирди”, деб айтган Эрдўған.

Унинг таъкидлашича, жаҳон ҳамжамияти Фаластиннинг тинч аҳолисига нисбатан Исроил ҳукуматининг ҳаракатларини тўхтатиш учун барча саъй-ҳаракатларни амалга ошириши лозим. “Агар Исроил зулмига жавоб берилмаса, дунё каллакесарлар ҳукмрон бўладиган алғов-далғовликка қараб кетади”, деб қўшимча қилган Эрдўған.

Тайёрлаган: Шуҳрат Раҳимов

#БМТ #Ражаб Эрдўған #Ғазо

2018 йил 14 май куни Қуддусда АҚШ элчихонаси очилишига жавобан фаластинликлар Ғазо секторида норозилик намойишлари ўтказишди. Натижада Исроил ҳарбийлари билан қуролли тўқнашувлар келиб чиқиб, ўнлаб фаластинлик ҳалок бўлди.