«Яндекс» ўзининг биринчи қурилмасини намойиш этди

«Яндекс» интернет-компанияси «Алиса» овозли ёрдамчиси билан жиҳозланган мультимедиа тизимини намойиш қилди. РБК компаниянинг Москвадаги тадбиридан шу ҳақидаги хабар билан бўлишди.

«Яндекс» асосчиси Аркадий Воложнинг маълум қилишича, бу компаниянинг шу кунга қадар дастурий таъминоти ишланмаси устида ишланган илк қурилмасидир. «Яндекс.Станция» — суҳбатлашиш ва топшириқ бериш (масалан, мусиқа ёки фильмни ёқиш) имкони бўлган уй ёрдамчиси, бу ақлли колонкани телевизорга улаш мумкин. 

"Биз кучли товуш, сифатли аудио ва видеоконтентга кириш имконига эга қурилмани ишлаб чиқишга ҳаракат қилдик", - деди тақдимотда «Яндекс.Станция» ишлаб чиқарувчиси Константин Круглов. «Алиса» овозли тизими «Яндекс.Музыка» сервиси, ivi.ru, «Кинопоиск» ва «Амедиатека» онлайн-кинотеатрлар каталогларига уланган. Станция мусиқа ёки фильмни топиши, контентни бошқариши (тезлаштириш, ёқиш-ўчириш, товушини баланд ёки пастроқ қилиш) мумкин. Яқин орада "эртак айтиш" ва телевизорни бошқариш функциялари пайдо бўлиши кутилмоқда. 

«Яндекс.Станция» ақлли колонкаси «Яндекс» томонидан ишлаб чиқилган, бироқ қурилма Хитойдаги фабрикада йиғилади.

Қурилма дўконларда шу йилнинг ёзида пайдо бўлади. Унинг нархи 9,9 минг рублни ташкил қилади. Константин Круглов колонкага талаб қандай бўлишини прогноз қилмасликни маъқул топди: "Бозор янги, унда бундай қурилмалар йўқ, шунинг учун охир-оқибат унга қандай талаб бўлишини олдиндан айтиш қийин". 

Аркадий Воложнинг таъкидлашича, «Яндекс» колонкалар ишлаб чиқарувчи компанияга айланаётгани йўқ, қурилмалар бозори эса компания учун асосий йўналиш эмас. Аксинча, компания ўз янги гаджетини бошқа ишлаб чиқарувчилар қурилмаларига интеграция қилишга тайёр.

Шунингдек «Яндекс» вакиллари «Алиса»нинг Sony Xperia EarDo "ақлли қулоқчинлари"да пайдо бўлиши ҳақида эълон қилди. Воложнинг сўзларига кўра, айни дамда «Алиса» Россиядаги смартфонларнинг 53 фоизи, қатор автомобиллар, шунингдек қулоқчинлар ва мобил колонкаларда мавжуд. Келгусида эса унинг ҳамма ерда бўлиши тахмин қилинмоқда.