НАТО Исроилни ҳимоя қилмаслигини маълум қилди 

Агар Исроил ва Эрон ўртасида уруш бошланса, НАТО Исроилни ҳимоя қилишни кафолатламайди. Бу ҳақда НАТО бош котиби Йенс Столтенберг Spiegel журналига берган интервьюсида маълум қилди.

Столтенбергнинг таъкидлашича, НАТО Исроил билан шерикчилик алоқаларига эга, бироқ Шимолий Атлантика келишуви фақат альянсга аъзо давлатларнинг хавфсизлигини кафолатлашни кўзда тутади. “Исроил бизнинг ҳамкор, бироқ НАТО аъзоси эмас. Келишувнинг 5-моддаси бўйича хавфсизлик кафолати Исроилга тааллуқли эмас”, деб айтган Столтенберг.    

Столтенберг НАТО Яқин Шарқдаги вазиятни тартибга солишда ва у ердаги ҳарбий ихтилофларда иштирок этмаслигини алоҳида таъкидлаб ўтган. “Бу бизнинг иш эмас”, деб айтган НАТО раҳбари.

Бундан ташқари, ташкилот аъзолари орасида Эрон билан ядровий келишув борасида зиддият мавжуд. 

НАТО ташкил этилиши тўғрисида 1949 йилда имзоланган келишувнинг 5-моддаси альянс аъзоларининг коллектив ҳимоясига бағишланган. Унга кўра, “НАТОнинг Европа ёки Шимолий Америкадаги бир ёки бир нечта аъзосига ҳужум қилиш барча аъзо давлатларга ҳужум деб ҳисобланади”. Шу тариқа, НАТО аъзоларининг бирига ҳужум ташкилотнинг барча аъзолари билан уруш бошланишини назарда тутади.

5-модда имзолангандан 50 йил ўтиб, АҚШдаги 2001 йил 11 сентябрдаги терактлардан кейин илк бор амалиётга киритилган. Келишувга кўра, НАТО давлатлари АҚШнинг террорчилик тузилмаларига қарши бир қатор амалиётларида иштирок этишган.