Марказий Африкада тинчликпарвар кучлар ҳужумга учради

Фото: AFP / Pacome Pabandji

3 июнда БМТнинг Марказий Африка Республикасидаги тинчликпарвар миссияси (MINUSCA) патрули қуролланган кишилар ҳужумига учради. Оқибатда бир тинчликпарвар аскар ҳалок бўлган, яна 7 нафари жароҳат олган. Бу ҳақда БМТ бош котибининг матбуот котиби Стефан Дюжаррик маълум қилди.

“БМТ бош котиби ҳужумни қоралади. Ҳужум оқибатида танзаниялик аскар ҳалок бўлди”, деб айтилган хабарда.

Таъкидланишича, МАРда йил бошидан ҳалок бўлган тинчликпарвар аскарлар сони 4 нафаргача ошди.

“Бош котиб МАР ҳукуматини ҳужум қилганларни жавобгарликка тортиш учун воқеани тергов қилишга чақирди”, дейилган хабарда.