Путин ва Трампнинг учрашув санаси эълон қилинди

Россия ва АҚШ президентлари Владимир Путин ҳамда Дональд Трамп 15 июль куни Венада учрашиши кутилмоқда. Австриянинг йирик Kronen Zeitung газетасида шу ҳақида хабар берилди. 

Манбага кўра, бир неча кун илгари россиялик ва америкалик дипломатлар учрашув тафсилотларига ойдинлик киритиш мақсадида Венага ташриф буюришган. Бундан ташқари, Австрия пойтахтига хавфсизлик бўйича мутахассислар гуруҳи ҳам ташриф буюрмоқда.

РФ президенти матбуот котиби Дмитрий Песков Кремль ҳозирча Путин ва Трамп учрашувига доир маълумотларни тақдим этишга тайёр эмаслигини қайд этган. "Тайёр бўлиши билан хабар берамиз", - дея ишонтирди у.

15 июль куни Москвада футбол бўйича жаҳон чемпионати бўлиб ўтади. У ерда Россия давлат раҳбари қатнашадими ёки йўқ, номаълум.

Яқин кунларда Москвага АҚШ президентининг миллий хавфсизлик бўйича маслаҳатчиси Жон Болтон ташриф буюриши керак. Путиннинг у билан учрашиш ё учрашмаслиги, ҳозирча номаълум. Бироқ давлат котиби Майк Помпеонинг тахминича, ушбу ташрифдан кейин РФ ва АҚШ етакчилари ўртасида музокаралар бўлиб ўтиши мумкин.

Владимир Путин ва Дональд Трамп 2017 йилнинг июлида Гамбургдаги "Катта йигирматалик" саммитида учрашишган. Ўшанда икки мамлакат етакчилари музокаралари икки соатдан ортиқ давом этган.