Ўзбекистон Республикаси бош вазир ўринбосари - молия вазири Жамшид Қўчқоров Жаҳон банкининг (ЖБ) Ўзбекистондаги ваколатхонаси раҳбари Хидеки Мори бошчилигидаги делегация аъзолари билан учрашди. Бу ҳақда Молия вазирлиги ахборот хизмати хабар бермоқда.
Конструктив суҳбат чоғида бўлиб ўтаётган ислоҳотларнинг устувор йўналишлари ва Жаҳон банки томонидан янада қўллаб-қувватлаш усуллари, Йўл харитасининг кейинги босқичларини ишлаб чиқиш борасида фикр алмашинилди.
«Биз Ўзбекистонда бўлиб ўтаётган янгиликлар ва ўзгаришларни катта қизиқиш билан кузатиб бормоқдамиз. Таъкидлаш жоизки, жуда кўп янгиликлар бўлиб ўтаётган ислоҳотлар билан узвий боғлиқ.
Мамлакат ҳаётидаги деярли барча жабҳаларини қамраб олувчи динамика – атрофдаги барчани қизиқтириб, катта таассурот уйғотиб келмоқда. Сиз жуда кучли ва кенг қамровли ислоҳотлар дастурини бошладингиз. Биз эса ўз навбатида, сизга ушбу ишларни ҳар томонлама амалга оширишда ёрдам бериш ва ҳамкорлик қилиш учун тайёрмиз», - деди Жаҳон банкининг макроиқтисодий амалиёт, савдо ва сармоялар бўйича менежери Сандип Махаджан.
Шунингдек, ўрта ва узоқ муддатли макроиқтисодий барқарорликни таъминлаш, хусусий сектор ривожланишини қўллаб-қувватлаш, оилавий тадбиркорликни янада ривожлантириш, бизнес муҳитида рақобатбардошликни ошириш, мамлакатнинг сармоявий муҳитини такомиллаштириш ва аҳолининг заиф қатламларига йўналтирилган ижтимоий ҳимоя кўрсатиш масалалари кўриб чиқилди.
