Наркомафия исковуч итнинг ҳаёти учун 70 минг доллар таклиф қилди

Гиёҳванд моддаларни олиб ўтиш билан шуғулланувчи Колумбиядаги йирик гуруҳ вакиллари Шарпа лақабли полиция итининг ҳаёти учун 200 млн песо миқдорида мукофот эълон қилишди. Бу ҳақда Tvnotas портали хабар бермоқда.

Портал маълумотларига кўра, ит хизмат вақтида тахминан тўққиз тонна кокаинни топишга муваффақ бўлган. Полицияга қарашли исковуч итнинг бундай ютуқлари наркомафияни шу даражада ғазаблантирдики, ҳатто «Кўрфаз клани» гуруҳи етакчиси Дарио Усуга немис овчаркасининг ҳаёти учун 200 млн песо таклиф қилган.

Таъкидланишича, полиция наркомафия томонидан берилган эълондан хабар топгач, ҳуқуқни муҳофаза қилиш органлари Шарпани Богота аэропортига хизматга ўтказиш ҳақидаги қарорга келган. Полициячиларнинг фикрича, итга бу ерда ҳеч қандай таҳдид бўлмайди.