Трамп аввалроқ «касал» деб атаган Колумбия президенти билан суҳбатлашди

АҚШ президенти Доналд Трамп Оқ уйда АҚШ ва Колумбия вакилларининг учрашувига тайёргарлик кўрилаётганини маълум қилди. Бу ҳақда Fox News ёзди.

«Мен учун Колумбия президенти Густаво Петро билан суҳбатлашиш катта шараф эди, у гиёҳванд моддалар билан боғлиқ вазиятни ва бизда бўлган бошқа келишмовчиликларни тушунтириш учун қўнғироқ қилди. Мен унга қўнғироқ ва суҳбат оҳанги учун миннатдорман ва яқин орада у билан учрашишни интиқлик билан кутмоқдаман», деб таъкидлади Трамп.

Оқ уй раҳбарининг қўшимча қилишича, ҳозир давлат котиби Марко Рубио ва Колумбия ташқи ишлар вазири ўртасида музокаралар олиб борилмоқда. Томонлар Оқ уйдаги учрашувни муҳокама қилмоқда.

Журналистларнинг эслатишича, АҚШ президенти Венесуэладаги операциядан сўнг Густаво Петрони огоҳлантирган. Хусусан, унинг айтишича, «Колумбия жуда касал» ва мамлакатни «кокаин ишлаб чиқаришни яхши кўрадиган касал одам бошқаради».

Венесуэладаги Мадурони қўлга олиш операциясидан сўнг Вашингтон Ғарбий яримшарнинг бошқа давлатларига нисбатан бир қатор баёнотлар берди. Хусусан, АҚШ давлат котиби Марко Рубио Куба ҳукуматини огоҳлантирди, Доналд Трамп эса Колумбияда операция ўтказилиши эҳтимолини истисно қилмади.

Бундан ташқари, АҚШ Гренландияни қўлга киритиш ниятини эълон қилишда давом этмоқда. Хусусан, The Economist журналистлари аввалроқ Вашингтон орол ҳукуматига таклиф қилиши мумкин бўлган келишув устида ишлаётгани ҳақида хабар берган эди.