АҚШ венесуэлалик медиамагнатни 1 млрд доллар пора беришда айблади 

АҚШнинг Майами шаҳрида яшовчи, Globovision телеканали эгаси 50 ёшли венесуэлалик медиамагнат Рауль Горрин Балисарио пул ювишда ва 1 млрд доллар пора беришда айбланмоқда. Бу ҳақда АҚШ адлия вазирлигида маълум қилинди.

Шунингдек, ушбу иш бўйича АҚШнинг 2 резиденти – венесуэлалик собиқ ғазначи, 54 ёшли Алехандро Андраде ва Доминикан Республикасидаги Banco Peravia банкининг собиқ эгаси, 50 ёшли Габриэл Хименесга айбловлар қўйилган. 

Адлия вазирлиги маълумотларига кўра, Балисарио Андраде ва венесуэлалик яна бир амалдорга мақбул курс бўйича валюта транзакцияларини амалга ошириш ҳуқуқини олиш учун миллионлаб доллар тўлаган. Медиамагнат, шунингдек, ўз шерикларига хусусий самолётлар, яхталар, уйлар ва қимматбаҳо отлар сотиб олишда айбланмоқда. Айбланувчилар жиноий схеманинг ишлашини таъминлаш учун бир қатор сохта компаниялардан фойдаланишган. Шунингдек, медиамагнат Banco Peravia орқали пуллар ювган. 

Андраде 1 млрд доллардан кўпроқ пора олишда ўз айбини тан олиб, АҚШ ҳукуматига шу миқдордаги активларини ўтказиб беришга рози бўлган. Хименес ҳам Балисарио билан тил бириктирганини тан олган. Андрадега 27 ноябрда, Хименесга эса 29 ноябрда жазо ҳукми чиқарилади.