«Ўзбеккино» миллий агентлиги Хитойнинг машҳур кинокомпанияси билан ҳамкорлик қилади

«Ўзбеккино» миллий агентлиги ва «Uzbekistan film holding» компанияси хитойлик таниқли кинопродюсер Ло Хао бошчилигида Ўзбекистонга келган «Hunan Heguang Media Co Ltd» кинокомпанияси вакиллари билан ҳамкорликда бир нечта лойиҳаларга келишиб олишди.

Хитойлик киносанъат усталари билан ҳамкорлик «Бир йўл, бир камар» лойиҳаси доирасида маданий муносабатларни мустаҳкамлашга хизмат қилади.

Kun.uz мухбири хабар беришича, Ўзбекистон ва Хитой киносаноати вакиллари «Уч шаҳар» лойиҳаси ва «Қаҳрамон» бадиий фильмларини ҳамкорликда ишлаш, кино ва сериаллар, телевидение учун видеоматериаллар тасвирга олишда ўзаро тажриба алмашишади.

Хитой киносаноати вакилларининг Ўзбекистонга ташрифи давомида «Orange Sky Golden Harvest Group» ва «Hunan Mango Studios» кинокомпанияларининг фильмлари - «Жаноб сув одами», «Ўтинчи Лю Хай», «Зулматдаги қора жанг» каби картиналарни тақдим этиш режалаштирилган.

Маълумот ўрнида, ушбу кинокомпаниялар ўз вақтида Брюс Ли ва Жеки Чан қатнашган фильмларни ҳам суратга олган.