Россия президенти Владимир Путин РФ Ўрта ва кичик масофадаги ракеталарни йўқ қилиш тўғрисидаги битимда иштирок этишни тўхтатиши ҳақида маълум қилди. Бу ҳақда ТАСС хабар бермоқда.
«Биз қуйидагича йўл тутамиз. Бизнинг жавоб худди шундай бўлади. Америкалик шериклар битимдаги иштирокни тўхтатаётганликлари ҳақида эълон қилишди, биз ҳам тўхтатамиз», - дея маълум қилди у мудофаа ва ташқи ишлар вазирлари Сергей Шойгу ҳамда Сергей Лавров билан учрашувда.
Путин Ўрта ва кичик масофадаги ракеталарни йўқ қилиш тўғрисидаги битим масаласи бўйича музокараларни бошлашга уринишни тўхтатиш ҳақида кўрсатма берган.
«Бизнинг бу соҳадаги барча таклифларимиз столда қолиб кетяпти, музокаралар учун эшиклар очиқ, - деди давлат раҳбари. - Шу билан бирга, иккала вазирликдан бу муаммо юзасидан ҳеч қандай музокаралар ташаббуси билан чиқмасликни сўрайман». «Ҳамкорларимиз биз билан бу муҳим мавзу бўйича тенг ҳуқуқли, аниқ мулоқот олиб боришга тайёр бўлишини кутамиз. Бу ҳам биз учун, ҳам шерикларимиз, ҳам бутун дунё учун муҳим», - дея аниқлик киритди у.
Россия президентининг таъкидлашича, РФнинг ўрта ва кичик масофадаги ракеталари, АҚШ худди шундай қуролни жойлаштирмагунича, дунёнинг у ёки бу минтақаларида пайдо бўлмайди.
АҚШ ва НАТО Россияни Ўрта ва кичик масофадаги ракеталар тўғрисидаги битимни бузганликда айбламоқда - 9М729 ракета тизими унинг шартларига зид экани айтилади. Россиянинг иддао этишича, ушбу ракета масофаси 500 километрдан ошмайди, битим шартлари эса бузилмаган. 4 декабрь куни АҚШ агар Россия 60 кун ичида уни бажаришга қайтмаса, битимдан чиқиши ҳақида маълум қилган.
Эслатиб ўтамиз, аввалроқ АҚШ томони ракеталар бўйича битимни қачон тўхтатиши маълум қилинганди.
