Валттери Боттас “Формула-1”нинг янги мавсумидаги илк ғолиби бўлди

“Мерседес” жамоасининг финляндиялик пойгачиси Валттери Боттас “Формула-1” пойгасининг янги мавсумдаги илк пойгаси – Мельбурнда ўтган Австралия гран-присида ғолиб бўлди.

Боттас аъло даражада старт олиб, пойга бошиданоқ амалдаги чемпион Льюис Хэмилтондан анча ўзиб кетиб, пойга охиригача етакчиликни сақлаб қолган.

Боттас пойгадаги энг тез ўтилган айлана учун қўшимча очколар олди ва бир пойгада 26 очко тўплай олган тарихдаги илк пойгачи бўлди.

2-ўринни эгаллаган Хэмилтон охирги 6 мавсумдан бери Мельбурндаги пойгада поулни ютиб келади, аммо бор-йўғи бир марта пойга ғолиби бўлган. Бу гал ҳам чемпионнинг ушбу трассада омади чопмади.

Маррага учинчи бўлиб “Ред Булл” аъзоси Макс Ферстаппен етиб келган. 

Пойганинг 2-босқичи 29-31 март кунлари Баҳрайнда бўлиб ўтади.