Талаба: Аттестациядан ўтиш учун тест жавоблари тарқатилмоқда

Kun.uz мухбири билан суҳбатлашган Жиззах политехника институти талабасининг айтишича, институт раҳбарияти талабаларнинг фан дастурларини ўзлаштириш даражасини аниқлаш аттестациясида тушиши мумкин бўлган савол-жавобларни талабаларга тарқатмоқда. Ушбу савол-жавоблар нусхаси таҳририятда ҳам мавжуд.

Талабанинг таъкидлашича, институтнинг Саноат технологиялар факультети Кимёвий технология таълим йўналишида таълим бераётган педагоглар шундай қилиб бўлажак аттестация натижаларини сохталаштиришга уринмоқда.

Вазирлар Маҳкамаси қарори талабига кўра, олий таълим муассасасида мавжуд йўналишлар ва мутахассисликларнинг умумий сонига нисбатан 75 ва ундан кўп фоизи «Аттестациядан ўтди» деб хулоса қилинса, таълим муассасаси «Аттестациядан ўтди», 67 фоиздан 75 фоизгача — «Аттестациядан шартли ўтди», 67 ва ундан кам фоизида «Аттестациядан ўтмади» деб эътироф этилади.

Жиззах политехника институти ректори Алишер Усмонқуловнинг Kun.uz'га маълум қилишича, 2018 йил март ойида ОТМда ўтган аттестациядан сўнг, институтнинг Саноат технологиялар факультети Кимёвий технология таълим йўналиши «Аттестациядан шартли ўтди», дея эътироф этилган. 

«Шартли аттестациядан ўтган йўналишлар бир йилдан сўнг яна аттестациядан ўтиши низомда белгиланган. Аттестацияда асосий кўрсаткич талабаларнинг қолдиқ билими, талабаларга ўтган фанларидан тест саволлари фан ўқитувчилари томонидан берилган, улар ўшанга тайёргарлик кўришмоқда», — дея вазиятга муносабат билдирди ректор.

Kun.uz талабалар тасарруфида бўлган, ўқитувчилар томонидан тарқатилган тест ва жавобларга эга, аммо уларнинг айнан аттестация саволлари эканлигини аниқлаш имконияти йўқ. Шунга қарамай, ЖизПИда кутилаётган аттестация ўрнатилган тартибда шаффоф ўтказилиши керак.