Трамп G20 саммитида Путин ва Си Цзиньпин билан учрашишини тасдиқлади

АҚШ президенти Дональд Трамп Россия президенти Владимир Путин ва Хитой раиси Си Цзиньпин билан Японияда кейинги ҳафта ўтадиган “Катта йигирматалик” (G20) саммитида учрашишини тасдиқлади.

“Мен Россия билан келишмоқчиман ва ўйлашимча, шундай ҳам бўлади. Мен Хитой билан келишмоқчиман ва ўйлашимча, шундай ҳам бўлади. Мен уларнинг иккиси билан кейинги ҳафта Японияда G20 саммитида учрашаман”, деб маълум қилган Трамп Fox News телеканалига берган интервьюсида.

“Улар кучли давлатлар, биз эса жуда кучли давлатмиз”, деб қўшимча қилган АҚШ президенти.

G20’нинг навбатдаги саммити 28-29 июнь кунлари Япониянинг йириклиги бўйича 3-рақамли шаҳри – Осакада бўлиб ўтади. Ушбу халқаро тадбирда 30 минг киши, жумладан “йигирматалик” давлатлари етакчилари, делегациялари аъзолари ва ОАВ вакиллари иштирок этиши кутилмоқда.