Янги Зеландия ҳукумати 15 март куни Крайстчерчдаги масжидларга ҳужумлардан кейин тақиқланган яримавтоматик қуролни аҳолидан қайта сотиб олиш кампаниясига 130 млн доллардан кўпроқ маблағ сарфлайди. Бу ҳақда “Нью Зиленд геральд” нашри мамлакат полиция вазири Стюарт Нэшга иқтибос келтирган ҳолда маълум қилди.
Нэшнинг айтишича, аҳолидан юзлаб турдаги қурол, катта сиғимли ўқдонлар ва бошқа ўқ-дориларни сотиб олиш режалаштирилган. Бу мақсадлар учун бюджетда 190 млн Янги Зеландия доллари (123 млн доллар) кўзда тутилган. Яна 18 млн Янги Зеландия доллари (11,6 млн доллар) қуролни йиғиб олишга сарфланади.
Таъкидланишича, полиция сотиб олинадиган қуроллар ва уларнинг сотиб олиниш нархи кўрсатилган рўйхатни эълон қилади. Қурол учун таклиф қилинадиган нарх унинг бозор нархининг 95 фоизгачасини ташкил қилиб, 10 минг Янги Зеландия долларигача (6,4 минг доллар) етиши мумкин. Компенсация қиймати қуролнинг ҳолатига ҳам боғлиқ бўлади ва у тегишли рухсати бор кишиларгагина тўланади.
Қуролни йиғиш июль ўрталарида бошланиб, 20 декабргача давом этиши белгиланган. Барча сотиб олинган қурол ва ўқ-дори йўқ қилинади.
12 апрелда Янги Зеландия ҳукумати Крайстчерчдаги терактлардан кейин ўқотар қурол айланмасини тартибга солувчи қонунчиликнинг қатъийлаштирилишини эълон қилганди. Айни вақтда мутасадди давлат идораларида ўқотар қуролга эга 14,3 минг киши ҳақида маълумот бор.
