Ўзбекистонда янги темир йўл линиясини қуриш таклиф этиляпти

Фото: Ўзбекистон темир йўллари

“Менинг фикрим” жамоавий мурожаатлар порталида Гурлан-Амударё темир йўл линиясини қуриш ҳақида петиция эълон қилинди.

“Хоразм вилояти Шовот туманидан Гурлан ҳамда Қорақалпоғистоннинг Амударё туманлари орқали янги темир йўл қуриб, Мискин-Нукус темир йўли билан туташтиришни таклиф қиламан”, - деб ёзади мурожаат муаллифи.

Билдирилишича, ҳозирги кунда Саратов-Тошкент ва Волгоград-Тошкент поездлари Урганчга кириши учун Нукус-Мискин-Урганч маршрути бўйлаб 200 километрга яқин ортиқча йўл юришади (Урганч яқинидан ўтиб, Мискин станциясидан яна орқага қайтади) ва йўловчилар 3 соатга яқин вақт йўқотишади.

Яъни, таклиф қилинаётган йўл қурилиб, ишга туширилса, йўналиш вақти 2-3 соатга қисқаради, бу катта иқтисодий самарадорликка эгалиги айтилади. Бундан ташқари, Гурлан ва Амударё туманларида янги иш ўринлари яратилади. Ушбу туманларга юкларни етказиб бериш анча арзонлашади.

“Юқоридагиларни инобатга олган ҳолда, Гурлан-Амударё темир йўл линиясини қуришни таклиф қиламиз”, - дейилади петицияда.

Тайёрлаган: Отабек Матназаров

#мурожаат #Амударё