Бугун, 31 июль куни Ахборот ва оммавий коммуникациялар агентлиги анжуманлар залида Республика Маънавият ва маърифат маркази раҳбар ходимлари иштирокида матбуот анжумани бўлиб ўтди.
Унда ташкилот раҳбари Алишер Қодиров Ўзбекистон Республикаси Президентининг 2019 йил 3 майдаги «Маънавий-маърифий ишлар самарадорлигини ошириш бўйича қўшимча чора-тадбирлар тўғрисида»ги қарори мазмун-моҳияти ва ижроси юзасидан маълумот берди, шунингдек, ОАВ ходимлари томонидан берилган саволларга жавоб қайтарди.
Тадбирда иштирок этган Kun.uz сайти мухбири Алишер Қодировдан ҳокимият учун курашувчи сиёсий партия («Миллий тикланиш» демократик партияси) етакчиси сифатида қандай қилиб мазкур ташкилотда ҳам иш олиб бораётгани, бу сиёсий жиҳатдан қанчалик тўғрилиги, шунингдек, иш жараёнига халақит бериш–бермаслиги ҳақида сўраган.
«Республика Маънавият ва маърифат марказига жамоатчилик асосида раҳбар бўлиб тайинланган пайтимда Олий Мажлис Қонунчилик палатаси депутати ҳам эдим. Кейинчалик марказдаги фаолиятимдан келиб чиқиб, партия кенгаши мен шу партияга раҳбар сифатида қўйилишимни маъқул кўришди. Нега? Чунки, Маънавият ва маърифат марказида олиб борилаётган ишлар партия ғоялари билан ҳамоҳанг, бир-бирига жуда ўхшаш. Мен ҳозир сизга ҳамма сирларни очмоқчи эмасман, лекин хоҳлардимки, марказдаги фаолиятим партия фаолиятига ёрдам берсин.
Биз марказда ишлаб чиққан лойиҳаларимизни партия орқали жамиятга тарғиб қилмоқчимиз. Масалан, тарбия борасидаги ғояларимизни жамиятга берсак бирор нарса ютқазамизми?
Сиз сиёсий таҳлилчи сифатида урғуни тўғри қўймоқдасиз, лекин ҳозирги шароитда Маънавият ва маърифат марказида ҳам ишлашим партияга фойда беряпти, жамият учун эса зарар бермаяпти».
Қодиров шунингдек, бу масалада бошқа партиялардан эътироз бўлмаяптими, мазмунидаги саволга ҳам жавоб қайтарган.
«Ҳозир бирорта партия бизнинг маънавий-маърифий масалаларни кўтариб чиқаётганимизга қарши эмас. Ҳатто биз ҳозир айрим партиялар электоратига даъвогарлик қилишни бошладик. Масалан, биздаги бир партия ўқитувчиларни ўз электорати сифатида кўради. Қандай қилиб ўқитувчилар у партиянинг электорати бўлиши мумкин? Педагогларнинг шу пайтгача бўлган муаммолари бирор марта кўтарилмаган. Биз бу масалани кўтардик. Биз ўқитувчиларни бизнинг электорат деб ҳисоблаймиз», дейди Алишер Қодиров.
