Саноат электрон портали ишга туширилади – Иқтисодиёт ва саноат вазирлиги

Бугун, 18 сентябрь куни Иқтисодиёт ва саноат вазирлиги биносида Молия вазирлиги, божхона қўмитаси, статистика қўмитаси ҳамда Иқтисодиёт ва саноат вазирлиги вакиллари билан анжуман ўтказилди. Унда экспортбоп, импорт ўрнини босувчи маҳсулотлар ишлаб чиқариш, маҳаллийлаштириш даражасини ошириш, мустаҳкам саноат тизимини яратиш ва бошқа масалалар ижроси қандай амалга оширилиши юзасидан мулоҳазалар билдирилди. Иқтисодиёт ва саноат вазири ўринбосари Ўктамжон Каримов айни вақтда ишлаб чиқарувчи ва истеъмолчи ўртасида алоқанинг сустлигини таъкидлаб ўтди ва буни ҳал қилиш учун вазирлик томонидан қилинадиган ҳаракатлар ҳақида маълумот берди.

“Ўзбекистонда истеъмолчи ва ишлаб чиқарувчилар ўртасида мустаҳкам алоқа тизими йўқ. Буни ўзгартириш учун нима қилмоқчимиз? Ечимини топдик: cooperation.uz саноат электрон портали ишга туширилади. Мамлакатда 610 та йирик ва 64 мингдан зиёд кичик саноат корхоналари бор. Улар қандай турдаги маҳсулот ишлаб чиқариши, экспорт, импорт ҳажми – ҳаммаси ҳақидаги маълумотлар порталга жойлаштирилади. Жараённи 2 босқичда амалга оширамиз. Биринчисида давлат улуши бўлган саноат корхоналари ҳақида маълумотлар берилади. Иккинчи босқичда эса хусусий корхоналар ҳам қамраб олинади. Порталга аъзо бўлиш бепул ва у 24/7 режимида ишлайди. Энг катта ютуқ маълумотлар очиқ тақдим этилишидир. Истаган фойдаланувчи порталга кириб Ўзбекистонга қандай турдаги маҳсулот қанча миқдорда импорт ёки экспорт қилинаётгани ҳақида билиши мумкин”.