Қозоғистоннинг Павлодар вилоятида 28 нафар йўловчиси бўлган автобус ағдарилиб кетди. Қурбонлар ва жабрланганлар йўқ, деб ёзмоқда КазТАГ.
Вилоят фавқулодда вазиятлар бошқармасининг хабар беришича, йўл-транспорт ҳодисаси 6 мартга ўтар кечаси Экибастуз қишлоғи ёнида, Қизилўрда-Павлодар автомобиль йўлининг 1160-километрида содир бўлган.
«Mercedes русумли автобус ҳайдовчиси рул бошқарувини йўқотиб, Новосибирск - Тошкент йўналиши бўйлаб ҳаракатланган автобусни ағдариб юборди, - дея изоҳ берган маҳкама. - Салонда 28 киши бўлган, улардан 26 нафари Ўзбекистон Республикаси фуқаролари ва икки ҳайдовчи - бизнинг мамлакатимиз фуқароси. Фавқулодда ҳолатлар тиббий маркази мутахассислари, полициячилар ва маҳаллий ижроия ҳокимияти вакиллари йўл-транспорт ҳодисаси рўй берган жойга етиб боришди. Шифокорлар кўригидан ўтгач, йўловчиларнинг барчаси ўткинчи транспортга ўтириб кетишди, ҳайдовчилар воқеа жойида қолди», - деб хабар берди ФВБ.
Вилоят полиция департаменти матбуот хизматининг хабар беришича, автобус Новосибирскдан Чимкентга кетаётган бўлган. Ушбу ҳолат бўйича суриштирув олиб борилмоқда.
