Интерпол эпидемия вақтида шифохоналарга хакерлик ҳужумлари кўпайганидан огоҳлантирди

Хакерлар тиббий муассасаларга тобора кўпроқ ҳужум амалга ошириб, уларнинг компьютер тизимларини блоклаб, пул талаб қилмоқда. Бу ҳақда Интерпол баёнотида маълум қилинди.

Фото: Edgar Su / Reuters

“Коронавирус эпидемиясига қарши курашнинг олд қаторида бўлган ва шундоқ ҳам мислсиз жисмоний хавфларга дуч келаётган шифохоналар ва бошқа тиббий муассасалар энди киберҳужумчилар таҳдидига учрамоқда. Интерполнинг кибертаҳдидларга жавоб берувчи жамоаси эпидемияга қарши курашга жалб қилинган муҳим ташкилотлар ва инфратузилмалар компьютер тизимлари товламачи-дастурлар билан зарарланиши сони анча ошганини таъкидламоқда”, дейилган баёнотда.

Таъкидланишича, тобора кўпроқ тиббий муассасалар номаълум кимсалар томонидан шантажга учрамоқда. Хакерлар уларни муҳим файллар ва тизимларга киришдан маҳрум қилиб, уларнинг блокдан чиқарилишига пул талаб қилмоқда.

Интерпол мутахассисларининг таъкидлашича, аксарият ҳолларда зарарлаш электрон почта орқали амалга оширилади. Жиноятчилар тиббий муассасаларга ҳукумат ёки соғлиқни сақлаш агентлигининг янги тавсиялари кўринишида мактублар жўнатмоқда. Бу мактублар вирусли сайтга ёки зарар келтирувчи файлларга ҳаволаларни ўзида сақлайди.

Шу сабабли Интерпол ташкилотга аъзо давлатлар полициясига ҳужумларни тергов қилишда ўз кўмагини таклиф қилди. Бундан ташқари, халқаро полиция ташкилоти муҳим тиббий инфратузилмалар хавфсизлигини яхшилаш бўйича техник кўмак ва маслаҳатлар беришга тайёрлигини билдирган.

#Интерпол #эпидемия

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.