Хоразмда «Лазги» академияси ташкил этилади

Президентнинг “Лазги” академияси фаолиятини ташкил этиш тўғрисида”ги қарори лойиҳаси муҳокама учун жойлаштирилди.

Маданият вазирлиги, Фанлар академияси, Хоразм вилояти ҳокимлиги ҳамда кенг жамоатчиликнинг Хоразм вилояти Урганч шаҳрида “Лазги” академияси фаолиятини ташкил этиш тўғрисидаги таклифига розилик берилади.

Қуйидагилар Академиянинг асосий вазифалари этиб белгиланади:

“Лазги” ижрочилигини янада ривожлантириш, бу борада шаклланган ижро ва ижодий мактаблар фаолиятини қўллаб-қувватлаш;

фан-таълим ва ижрочиликнинг интеграциялашуви жараёнини жадаллаштиришга кўмаклашиш;

“Лазги” ижро йўли намуналари “Олтин фонди”ни яратиш;

“Лазги” ижро йўллари бўйича илмий-тадқиқотлар олиб бориш ва кенг тарғиб қилиш бўйича халқаро ҳамкорликни йўлга қўйиш;

“Лазги”ни асраб-авайлаш, замонавий ижро услублари намуналари билан янада такомиллаштириш, унинг ижтимоий-тарихий илдизлари, илмий-назарий негизлари, миллий ва умумбашарий қадриятлар билан боғлиқ жиҳатларини олимлар ва ижрочи мутахассислар иштирокида чуқур ўрганиш;

“Лазги” ижро намуналарини радио-телевидение ва бошқа оммавий ахборот воситалари ҳамда Интернет тармоқлари орқали чет элларда кенг тарғиб этиш.

Белгилаб қўйилишича, Академия Маданият вазирлиги тизимидаги Давлат муассасаси ҳисобланади, Молия вазирлиги ғазначилик бўлинмасида шахсий ғазна ҳисоб рақамига, Давлат герби тасвири туширилган ва ўз номи ёзилган муҳрга, штампга, бланкаларга эга бўлади.

Академия фаолиятини молиялаштириш Давлат бюджети маблағлари, ўз даромадлари ва қонун ҳужжатларида тақиқланмаган бошқа манбалар ҳисобидан амалга оширилади.

Маданият вазирлиги Хоразм вилояти ҳокимлиги билан биргаликда Академиянинг самарали фаолият кўрсатиши учун барча чора-тадбирларни амалга оширади.

Академия қошида хўжалик ҳисобидан доимий равишда фаолият кўрсатувчи қуйидагилар:

“Лазги”ни яратилиш тарихи ва унинг ривожланиш даврини ўзида тўлиқ қамраб олган музей;

“Лазги” ижро йўлида яратилган ижод намуналаридан ташкил топган фонотека;

“Лазги”га оид либослар намунаси галереяси, кўргазмалар зали ҳамда артистик кафе;

Академия муассислигида “Лазги” номли илмий-услубий журнал;

“Лазги” ҳаваскорлик болалар театр-студияси ташкил қилади.

Ўзбекистон давлат филармонияси Хоразм вилояти бўлими ҳисобидаги Урганч шаҳри, Машъал кўчаси 4-уйда жойлашган бино ва “Лазги” ансамбли ҳамда унга тегишли бўлган барча моддий қийматликлар Академия ҳисобига ўтказилади.

Академия Хоразм вилояти, Урганч шаҳри, Хонқа кўчасида жойлашган “Хоразм тарихи ва маданияти” учун ажратилган бинога текин фойдаланиш ҳуқуқи асосида жойлаштирилади.