Тожикистонда 49 нафар имом ва мулла коронавирус юқтиргани маълум бўлди

Тожикистонда диний қўмита расмий рухсатномасига эга бўлган 49 нафар диний раҳнамолар коронавирусга чалинган. Улардан бири, Ашт ноҳиясидан бўлган имом хавфли вирус юқтириши натижасида вафот этган. «Азия-Плюс» сайтининг хабар беришича, бу ҳақда Тожикистон дин ишлари қўмитасида бугун ўтказилган матбуот анжуманида қўмита раиси Сулаймон Давлатзода маълум қилган.

Фото: Asia-Plus

Давлатзоданинг сўзларига кўра, коронавирус юқтирган муллалар ва имомлар жаноза намозларини ўқиш вақтида Соғлиқни сақлаш вазирлиги берган кўрсатмаларга амал қилмаган. Шунингдек, улар жанозадан кейин ҳам бир неча кунлаб марҳумларнинг уйида фотиҳахонликларда қатнашган.

Шунингдек, Давлатзода ҳозирги таҳликали кунларда тўйларга ҳам 100-150 нафар одам чақириш нотўғри иш бўлиши, 20-30 нафар одам чақириб тўй ўтказиш лозимлиги, ортган нарсаларни кам таъминланган қўшнилар ва маҳалладошларга тарқатилса савоб бўлишини айтиб ўтган.

Матбуот анжуманида ҳозир бўлган Тожикистон Уламолар кенгаши раҳбари Саидмукаррам Абдуқодирзода пандемия шароитида жаноза намозларини ўқиш учун маййитни масжидга олиб келиш шарт эмаслигини, уни хонадонларда, иложи борича камроқ одам иштирокида, карантин қоидаларига риоя қилган ҳолда ўқиш лозимлигини билдирган.

#Тожикистон #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.