Миришкор туманидаги «темир дафтар»га киритилган 880 нафар ижтимоий ҳимояга муҳтож оилаларга «Саховат ва кўмак» жамғармаси ҳисобидан Қурбон ҳайити муносабати билан бир марталик пул маблағлари тарқатилган эди.
Вилоят ҳокими Зойир Мирзаев ижтимоий ҳимояга муҳтож оилалар рўйхатини қайтадан кўриб чиқиш бўйича туман ҳокимлигига топшириқ берган. Бу ҳақда Миришкор туман ҳокимлиги ахборот хизмати Kun.uz’га маълум қилмоқда.
Маълум бўлишича, тумандаги айрим ҳудудларда бир қатор фуқаролар мазкур рўйхатга кирмагани, бир марталик ёрдам олмагани юзасидан қилган шикояти бунга сабаб бўлган.
2 август куни Миришкор туманида бўлган вилоят ҳокими ижтимоий кам таъминланган оилалар рўйхати юзасидан танқидий муносабат билдирган, маҳалла раисларига рўйхат ҳаққоний бўлиши лозимлигини уқтирган. Барча сектор ва маҳаллаларда штаблар тузилиб, сектор раҳбарлари ўзларининг штаб аъзолари ва маҳалла раислари билан бирга ҳар бир маҳалла кесимида «темир дафтар»га киритилган муҳтож оилаларнинг ҳаққоний рўйхатини яна бир бор қайта кўриб чиқиши шартлигини айтган.
Туман ҳокимлиги ахборот хизматининг маълум қилишича, бир кун ичида мазкур рўйхат қайтадан кўриб чиқилиб яна бир неча оилалар қўшимча қилинган. Иш билан таъминланган бир қатор фуқаролар эса мазкур рўйхатдан чиқарилган.
