Лукашенко Путиндан янги турдаги қуроллар сўради

“Мен Россия президентидан баъзи турдаги қуролларни сўрадим. Унга келганингизда Иттифоқдош давлат борасида нимани ва қаерда мустаҳкамлаш кераклигини кўриб чиқамиз, дедим. Қўрқадиган жойимиз йўқ, биз бунга боришга тайёрмиз”, деб айтган Лукашенко.

Унинг таъкидлашича, охирги ҳодисалар “беларуслар ва россияликлар манфаатларини дадилроқ ҳимоя қилиш кераклигини” кўрсатмоқда.

Лукашенко “кимдир Беларусь заифлашиб қолди, қаршилик кўрсата олмайди, Россия четга ўтиб олади”, деб ўйлаётган бўлса янглишишини ва “аҳмоқларгина бундай ўйлашини” айтган.

“Биз нафақат Беларусдаги, балки чегараларимиз бўйлаб ҳам вазиятни назорат қила оламиз. Брестдан Владивостоккача бўлган умумий ватанимизни мудофаа қилиш борасида ишончли эканимизга шубҳа қилмасангиз ҳам бўлади”, деб таъкидлаб ўтган Беларусь раҳбари учрашувда.

Бундан ташқари, Лукашенко Шойгуга Брест яқинида ўтаётган “Славян биродарлиги” ҳарбий машғулотларини давом эттиришни ва янги қўшма машғулотлар ўтказиш ҳақида ўйлаб кўришни таклиф қилган.

“Биз кимнидир асабийлаштиришни, сурбетлик билан бирор нарса қилмоқчи эмасмиз, бироқ ўз манфаатларимизни ҳимоя қилишимиз лозим”, деб айтиб ўтган Беларусь раҳбари.   

Шойгу, ўз навбатида, Беларусь ва Россия дастлабки режага кўра жорий йилда ҳарбий соҳада 130га яқин тадбир ўтказмоқчи бўлганини маълум қилган.

“Афсуски, бу режани фақатгина 30 фоизга бажардик. Биз йил охиригача жуда бўлмаса 70 фоизлик натижага чиқишимиз лозим. Бунинг учун жипслашиб, ҳозир бораётган машғулотларнинг иккинчи босқичини ўтказишимиз керак. Октябрда навбатдаги машғулотларни ўтказамиз”, деб таъкидлаб ўтган Россия мудофаа вазири.  

Аввалроқ, 14 сентябрда Лукашенко Сочида Путин билан учрашганди.