Моргенштерннинг сўзларига кўра, у автомобилни самолётда олиб келиш учун қарийб 56 млн сўм сарфлаган.
Россиялик рэпер Моргенштерн ўзига тегишли «Mercedes» автомобилини Ўзбекистонга олиб келиб, бухоролик йигитга совға қилиш учун қанча пул сарфлаганини айтди. У бу ҳақда ўзининг YouTube-каналига жойлаштирган видеосида маълум қилди.
Аввалроқ Kun.uz Давлат божхона қўмитаси матбуот хизматидан олган маълумотга кўра, Моргенштерн «Mercedes-Benz E 200»ни Ўзбекистонга олиб кириш учун жами 340 млн сўм божхона тўловларини тўлагани маълум бўлганди.
Моргенштерннинг сўзларига кўра, у божхона тўловларидан ташқари автомобилни самолётда олиб келиш учун қарийб 56 млн сўм сарфлаган.
Бундан ташқари, артист автомобилнинг Россияда берилган давлат рақамини Ўзбекистон давлат рақамига алмаштириш учун ҳам пул тўлаган.
Моргенштерннинг таъкидлашича, қатор қоидалар боис автомобилни Ўзбекистонга олиб кириш қийин бўлган.
Эслатиб ўтамиз, россиялик таниқли рэпер Алишер Валеев – Моргенштерн Instagram'да Give-away танловини эълон қилган, танловга қўйилган суперютуқ – «Mercedes-Benz E 200» автомобили бухоролик Азим Абдуллаевга насиб қилганди.
