Вазирлик: Ўзбекистон электр энергетика тармоғининг ишлаш тартиби тўлиқ тикланди

5 январь куни Марказий Осиё ягона энергия тизимининг электр узатиш тармоқларидаги носозликларга сабаб бўлган электр энергиясини ишлаб чиқариш жараёнини ўрганиш учун тузилган комиссия ҳодиса сабабини аниқлади.

Энергетика вазирлигининг 7 январь оқшомидаги хабарига кўра, Толимаржон ИЭСдаги буғ-газ қурилмалари ортиқча юклама билан ишлаши оқибатида носозлик юзага келган ва аварияга қарши автоматика ишлаб режадан ташқари ўчирилган.

«Бунинг натижасида Марказий Осиёнинг ягона энергия тизимини (ЯЭТ) Россия ва Қозоғистоннинг ягона энергия тизими билан боғлайдиган транзит тармоқларида юклама кескин кўтарилган. Бу эса энергия тизимларининг параллел ишлаши барқарорлигининг бузилишига олиб келди.

Натижада Қозоғистон шимолий қисмининг энергия тизимлари Марказий Осиёнинг ЯЭТидан ажралиб чиқди. ЯЭТ МО частотаси 48,15 Гц. гача камайди. Шу билан бирга, бир қатор истеъмолчилар автоматик равишда тармоқдан узиб қўйилди, иссиқлик электр станцияларининг (ИЭС) энергия блоклари юкламалари туширилди», – дейилади хабарда.

Таъкидланишича, аварияга қарши автоматик бошқариш тизими энергия блоклари учун катта муаммолар ва зарарли оқибатларнинг олдини олишга хизмат қилади.

«Тадбирлар таҳлили асосида ва шу каби ҳодисаларнинг олдини олиш мақсадида режали чоралар ишлаб чиқилмоқда», – дея қўшимча қилган Энергетика вазирлиги ахборот хизмати.

Эслатиб ўтамиз, аввалроқ вазирлик автомобилларга газ тўлдириш компрессор шохобчаларининг иш вақти 05:00-15:00 этиб чеклангани юзасидан Kun.uz'га берган изоҳида, 9 январга қадар вазият барқарорлашиши кутилаётганини маълум қилганди.