Россия президенти Владимир Путин ҳамда АҚШнинг 46-президенти Жо Байден илк марта телефон орқали суҳбатлашди. Бу ҳақда Кремль расмий сайтида ёзилди.
Манбада айтилишича, Путин ҳамкасбини фаолиятини бошлагани билан табриклаган. Путин суҳбат давомида икки мамлакат ўртасидаги муносабатларнинг нормаллашиши бутун дунёдаги хавфсизлик учун яхши эканини таъкидлаган. Томонлар ядро қуролини ишлатишни чеклаш бўйича келишувни узайтиришга қаратилган ноталар алмашинувини олқишлашди. Бу борада келишувлар тез орада якунланиши маълум қилинди.
Россия ва АҚШ томонидан 2010 йил имзоланган бу келишув 2021 йил 5 февралда якунланиши керак эди. Томонлар келишувни яна 5 йилга узайтириш бўйича қўл остидагиларга топшириқ беришди. Путин ҳужжат муддатини узайтиришни ратификация қилиш бўйича давлат Думасига кўрсатма берган.
Байден ва Путин коронавирусга қарши курашда ўзаро ҳамкорликни муҳокама қилишди. Шунингдек, савдо-иқтисодий алоқалар ҳақида ҳам гаплашишди. Президентлар АҚШнинг очиқ осмон келишувидан бир томонлама чиқиб кетгани ва Эрон ядро дастури бўйича биргаликда ҳаракат қилиш каби мавзуларга ҳам тўхталган. Путин БМТ Хавфсизлик кенгашининг доимий аъзолари иштирокида саммит ўтказишни таклиф қилди.
Кремль сайтида ёзилишича, суҳбат самимий руҳда кечган ва кейинчалик алоқада бўлиш келишиб олинган.
Оқ уй версияси
Оқ уйнинг суҳбат ҳақидаги хабарида эса Кремль қайд этмаган тафсилотлар келтирилган. Хусусан, Байден суҳбатда Россиянинг 2020 йилги АҚШ президентлик сайловларида аралашгани мавзусини кўтарган. Шунингдек, Кремлнинг суҳбат ҳақидаги хабарида Алексей Навальнийнинг заҳарланиши ҳақида сўз бормаган. Оқ уйда эса Байден Путин билан суҳбатда бу мавзу АҚШ учун муҳимлигини айтганини таъкидлашди. Байден суҳбатда АҚШ Россия агрессиясига қарши курашда Украинани қўллаб-қувватлашини ҳам айтган.
«Умид қиламанки, ядро қуролини чеклаш келишуви бўйича мамлакатларимизнинг умумий манфаатлари учун ҳаракат қила оламиз. Шу ўринда Навальний ишида, Solar Winds'га қилинган ҳакерлик ҳужуми ва Афғонистондаги америкалик аскарларнинг боши учун пул сўралгани ҳақида хабарларда АҚШ Россиянинг ҳаракатларидан хавотирда эканини билдирмоқчиман. Бу борада махсус хизматларга кўрсатма бердим ва ҳар қандай янгилик пайдо бўлганда, бу саволларни руслар олдида кўтаришимни айтдим», деган Байден суҳбат давомида Оқ уй версиясига кўра.
