Сувайш каналидаги кемани силжитиш мақсадида ундаги юк туширилади

Миср президенти Абдулфаттоҳ ас-Сисий Сувайш каналини тўсиб қўйган Ever Given кемасидан юкни туширишни буюрди. Аввалроқ қутқарувчилар саёзликка ўтириб қолган кемани ундаги контейнерларни туширмасдан йўлдан олишни мўлжаллаётганди.

Фото: AP Photo/Mohamed Elshahed

Al Arabiya News'нинг канал бошқармаси бошлиғи Усома Рабийяга таяниб хабар беришича, Миср президенти кемани йўлдан олишнинг биринчи ва иккинчи сценарийси муваффақиятсизликка учрашини кутиб ўтирмасдан, учинчи сценарийга ўтишни буюрган. Ушбу сценарий кемани саёзликдан олиш учун ундаги контейнерларни туширишни кўзда тутади.

Рабийянинг таъкидлашича, кемадаги 18 мингта контейнердан баъзиларини тушириш учун махсус қурилма керак бўлади ва Миср президенти уни қўллашга рухсат берган. Миср ҳукуматига кўра, Сувайш каналида қатнов тўхтаб қолгани сабаб мамлакат ҳар куни 12-14 миллион доллар йўқотмоқда.

«Операцияни якунлашимиз билан канал раҳбарияти у ерда тўпланиб қолган кемаларни эвакуация қилиш билан шуғулланади. Биз кемачилик операторлари билан кейинги ҳаракатларимизни муҳокама қиламиз, чунки мижозлардан воз кеча олмаймиз», деб айтган Рабийя. У кемани саёзликдан олиш бўйича операция қачон якунланишини айта олмаслигини таъкидлаб ўтган.

Контейнер ташувчи улкан кема Сувайш каналида 23 март куни саёзликка ўтириб қолган ва канални тўсиб қўйган. Ҳозиргача уни силжитиш бўйича уринишлар бесамар кетмоқда. Таъкидланишича, кеманинг саёзликка ўтиришига кучли шамол сабаб бўлган. Турли прогнозларга кўра, каналда қатновни тиклаш учун бир ҳафтадан уч ҳафтагача вақт талаб этилиши мумкин.