Францияда саккиз киши AstraZeneca билан эмланганидан кейин вафот этди

Ташкилот маълумотларига кўра, 2 апрелдан 8 апрелгача мутахассислар томонидан тромбознинг атипик локализацияси бўйича тўққизта янги ҳолат, шунингдек, изоляцияланган томир ичи қон ивишининг иккита ҳолати қайд этилди. 

Францияда аҳолини эмлаш бошланганидан бери, эмланган фуқароларда тромб бўйича 23та ҳолат қайд этилди, шулардан саккизтаси ўлим билан якун топди. 

Таъкидланишича, Францияда AstraZeneca компаниясининг препарати билан фақат 55 ёшдан ошган кишиларни эмлашга рухсат берилган. 

Аввалроқ, 15 апрел куни Дания Vaxzevria коронавирусга қарши вакцинасидан бутунлай воз кечгани ва барча аҳоли гуруҳлари учун AstraZeneca препаратидан фойдаланишни тақиқлаган биринчи Европа давлатига айлангани маълум бўлди. 

Худди шу куни Италияда AstraZeneca препарати билан эмланганидан кейин тромбоз натижасида тўртта ўлим ҳолати қайд этилгани маълум бўлди. 

14 апрел куни Европа комиссияси 2022 йилда AstraZeneca ва Johnson & Johnson компаниялари билан коронавирусга қарши вакциналар етказиб бериш бўйича шартномаларни узайтирмаслиги ҳақида хабар берилди. Европа иттифоқи векторли вакциналар ўрнига РНК вакциналарни қўлламоқчи. 

Европа тиббиёт воситалари агентлиги (EMA) вакили Марко Кавалери AstraZeneca препарати билан эмлаш ҳамда тромбоз ўртасидаги боғлиқликни тасдиқлади. Бироқ, унинг таъкидлашича, регулятор вакцинадан фойдаланиш тромбозни айнан қандай келтириб чиқаришини тўлалигича аниқламаган. 

EMA шунингдек, тромблар пайдо бўлиши хавфини препаратнинг кам учрайдиган асоратлари рўйхатига киритишни талаб қилди, аммо вакцинанинг фойдаси хавфдан анча юқори эканлигини тан олди. 

AstraZeneca’нинг ўзи тромблар пайдо бўлишига айнан вакцина сабаб бўлгани борасида ҳеч қандай далил йўқлигини маълум қилган.