Ўзбекистонда 243та мактаб ўқувчилари масофавий таълим шаклида ўқишни давом эттирмоқда. Бу ҳақда Халқ таълими вазирлиги матбуот хизмати хабар берди.
23 апрель ҳолатига кўра, республика бўйлаб 243та мактабда ўқувчилар орасида коронавирусга чалиниш ҳолатлари аниқлангани туфайли таълим олиш тўлиқ онлайн таълимга ўтказилган. 29та мактабда фақат касаллик аниқланган ўқувчи ўқийдиган синфлар карантинга ёпилиб, ўқувчилар онлайн таълим олмоқда.
“Бу рақамлар Санитария-эпидемиологик хизмат марказларининг талабномаларидан келиб чиқиб ўзгариб боради. Онлайн таълим олаётган мактаб ўқувчилари учун Миллий телерадиокомпания билан ҳамкорликда “Онлайн мактаб” лойиҳаси йўлга қўйилган”, дейилади хабарда.
Шунингдек, онлайн мактаб дарсларини Uzeduonlinemaktab телеграм канали орқали ҳам қайта кўриш имконияти мавжуд.
Эслатиб ўтамиз, аввалроқ онлайн таълимга ўтган мактаблар сони 163тани ташкил этаётгани ҳақида хабар берилган эди.
