Самарқанд вилояти Ургут тумани марказида жойлашган деҳқон бозорига туташ 5 та савдо дўкони ёниб кетган. Бу ҳақда вилоят Фавқулодда вазиятлар бошқармаси хабар бермоқда.
Қайд этилишича, кеча 23 май куни соат 23:06ларда Ургут шаҳри «Қўйи Каланган» МФЙ, Темирчилар кўчасида жойлашган «Ургут деҳқон-бозори» МЧЖ ҳудудига туташ бўлган 2 қаватли савдо дўконининг 2-қаватидаги 5 та савдо дўкони ёниб кетган.
Қайд этилишича, ёнғинга туман ФВБ ходимлари 23:14да етиб бориб, соат 23:35да ўраб олиниб, соат 00:33да ўчирилган. Ёнғинда савдо дўконларининг тахминан 150 м² майдонида шифт ва том қисми ёнган. Уларга туташ савдо дўконларининг 400 м² майдони сақлаб қолинган.
Аниқланишича, ёниб кетган дўконларнинг иккитасидан новвойхона сифатида фойдаланилган. 3та савдо дўконидан ҳеч ким фойдаланмаган. Таъкидланишича, ёнғиннинг тахминий сабаби ва моддий зарари аниқланмоқда.
P.S. Ўзбекистондаги аксарият деҳқон ва буюм бозорларида сўнгги қарич ергача тадбиркорларга бериб юборилгани учун, ёнғинга қарши кураш бўлимининг машиналари киришда муаммоларга дуч келади. Гувоҳларнинг сўзларига кўра, кеча тунда Ургут бозорига туташ савдо дўконларида рўй берган ёнғинни ўчириш пайтида ҳам шу ҳолат кузатилган.
