Amazon 8,45 миллиард долларга Metro-Goldwyn-Mayer киностудиясини сотиб олади 

АҚШнинг Amazon интернет-ритейлери Ҳолливуднинг Metro-Goldwyn-Mayer киностудиясини 8,45 млрд долларга сотиб олишга келишиб олди. Бу харид Amazon Prime стриминг хизматига киностудиянинг кўп сонли фильмларига эгалик қилиш ҳуқуқини беради.

Amazon Studios ва Prime Video вице-президенти Майк Ҳопкинснинг маълум қилишича, MGM фильмлар кутубхонасида 4 мингдан кўпроқ фильм ва 17 минг телешоу бор.

Эндиликда битим ёпилиши учун мутасадди идоралар рухсатини олиши керак.

MGM’нинг энг йирик акциядори АҚШнинг Anchorage Capital Group хеж-фонди ҳисобланади. Охирги йилларда хеж-фонд паст кўрсаткичлар ва мижозлар кетиши сабабли босим остида қолганди. Унинг сармоялари асосий қисми эса MGM’га тўғри келган.

MGM кинофильмлар ва телешоулар ишлаб чиқариш билан шуғулланади. Унга “Рокки”, “Қўзичоқлар сукути”, Ёмғир одами”, “Терминатор” каби машҳур фильмлар тегишли. Шунингдек, киностудия Danjaq LLC билан бирга британ разведкаси жосуси Жеймс Бонд ҳақидаги фильмларга эгалик ҳуқуқига эга.

Компаниянинг жорий йил 1-чоракдаги тушуми 403 млн долларни, соф даромади эса 29 млн долларни ташкил қилган.