Ҳафтанинг биринчи ярмида ҳаво ҳарорати бироз пасаяди

Ҳафтанинг биринчи ярмида Ўзбекистон ҳудуди Қозоғистон ҳудудларидан кириб келган салқин ҳаво массалари таъсири остида бўлади.

“Ўзгидромет” хабарига кўра, ҳарорат кечалари 15-18 даража илиққача пасаяди, кундуз кунлари 32-35 даража иссиқ атрофида, жанубда 36-38 даража иссиқ бўлади.

Ҳафтанинг иккинчи ярмида шарқий ботиқлик республика ҳудудидан силжийди, ҳаво ҳарорати аста-секин кечалари 20-23 даража иссиққача, кундуз кунлари 36-39 даража иссиққача, шимолда, жанубда ва чўл ҳудудларида 40-41 даража иссиққача кўтарила бошлайди.

Республиканинг катта қисмида ҳафта давомида қуруқ ва кам булутли об-ҳаво сақланиб туради, фақат Андижон, Наманган, Фарғона вилоятларида 14 июнда куннинг иккинчи ярмида баъзи жойларда қисқа муддатли ёмғир ёғиб, момақалдироқ бўлиши мумкин.

14-15 июнда республиканинг тоғолди ва тоғли ҳудудларида конвектив булутлилик ривожланишида баъзи жойларда момақалдироқ билан қисқа муддатли ёмғир ёғиши мумкин.

Республика бўйича 14-15 июнда ва 19 июнда шамол баъзи жойларда чангли бўрон билан 17-22 м/с гача кучайиши мумкин.

14 июнда кутилаётган маҳаллий ёмғирлар ҳисобига Андижон, Наманган, Фарғона вилоятларининг тоғолди ва тоғли ҳудудларида сел келиш хавфи бор.