Хитой ташқи ишлар вазири Ван И АҚШ давлат котиби ўринбосари Уэнди Шерман билан Тяньцзинда музокаралар ўтказди. У Вашингтондан барча санкцияларни бекор қилишни талаб қилди.
“Биз АҚШдан Хитойга қарши киритилган барча бир томонлама санкциялар ва Хитой маҳсулотларига юқори қийматдаги божларнинг дарҳол бекор қилинишини талаб қиламиз. Умид қиламанки, АҚШ Хитойга нисбатан холис позицияни шакллантиради ва манманликни бас қилади”, деб айтган Хитой вакили.
Ван Ининг таъкидлашича, АҚШ ўзидан “доно устозни ясамаслиги” ва “оқилона сиёсатга қайтиши” керак. Унинг айтишича, модернизация ҳуқуқи фақатгина АҚШга тегишли эмас.
АҚШ давлат департаменти томонлар учрашув вақтида бир қатор масалалар бўйича “очиқча суҳбатлашганини” маълум қилган. Таъкидланишича, АҚШ ва Хитой учрашувда “алоқа каналларини очиқ қолдириш муҳимлигини” намойиш қилган. АҚШ вакили Вашингтон Пекин билан ихтилофга боришни истамаслигини ва давлатлар ўртасидаги “қатъий рақобатни” қўллаб-қувватлашини айтган.
Ўтган ҳафта АҚШ Хитойни ҳакерлик ҳужумларида айблаган. Вашингтоннинг фикрича, Пекин жиноий кибергуруҳлар билан ҳамкорлик қилади ва уларни ўз мақсадларига эришишда қўллайди. НАТО, Европа иттифоқи, Британия ва бошқа бир қатор ғарб давлатлари Вашингтоннинг ушбу айбловларини қўллаб-қувватлаган.
